Хоминаий ўлдирилгач, Россияда Путинни қўриқлаш учун яратилган кузатув тизими ўчириб қўйилди

Россия махсус хизматлари Эрон олий раҳбари Али Хоминаий ўлдирилгандан сўнг Россия президенти Владимир Путин ва давлатнинг бошқа юқори мартабали шахслари хавфсизлигини таъминловчи махсус кузатув тизимини бир муддат ўчириб қўйди.

Фото: Shamil Zhumatov / Reuters / Scanpix / LETA

Financial Times (FT) нашрига икки хабардор манбанинг айтишича, махсус хизматлар тизимни синчковлик билан текшириб, уни интернетдан имкон қадар изоляция қилишга уринган, шундан сўнг уни қайта ёқишган. Бу тизим Москва кўчаларида ўрнатилган 300 мингга яқин камералардан алоҳида ишлайди.

Февраль ойи охирида Эрон олий раҳбари Али Хоминаий ўлдирилгандан сўнг, Исроил разведкаси Теҳрон йўлларидаги кузатув камераларини бузиб киргани ва улардан йиллар давомида маълумот олгани маълум бўлди. Ушбу камералардан олинган маълумотлар Исроил ҳарбийларига Хоминаий ўлдирилган ҳаво ҳужумини тайёрлашга ёрдам берган.

FT нашрининг таъкидлашича, ҳакерлар ёки хорижий разведка органлари томонидан кузатув тизимларини бузиш янгилик эмас. Бироқ, ҳозир сунъий интеллект берилган сўровларга мос келадиган объектларни топиш учун минглаб камералардан миллионлаб соатлик видеоларни таҳлил қилиш имконини бераётган бир пайтда, рухсатсиз уланиш айниқса хавфлидир.

Нашрнинг ёзишича, эронликлар ҳам Исроилнинг видеокузатув тизимларини бузиб киришга муваффақ бўлган, бироқ узлуксиз тасвир оқимини қайта ишлаш имконини берувчи восита бўлмаса, бундай бузиб киришнинг фойдаси чекланган эди.

Май ойи бошида Европа давлатларидан бирининг разведкаси Россия президентининг хавфсизлигига масъул бўлган Федерал хавфсизлик хизмати (ФХХ) Владимир Путинга суиқасд қилинишидан қўрққани сабабли уни ҳимоя қилиш чораларини сезиларли даражада кучайтиргани ҳақида хабар берган эди. FT нашрининг таъкидлашича, бундай таҳдид Россиядаги кузатув камераларига уланишга муваффақ бўлган, шунингдек, юқори мартабали рус ҳарбийларига суиқасдни тайёрлашда мобил телефон маълумотларини кузатган Украина махсус хизматларидан келиб чиққан бўлиши мумкин.