Германиянинг Шлезвиг-Гольштейн федерал ери парламенти қонунчиликка “Reerdigung” деб номланган дафн этишнинг янги усулини киритди. Бу ҳақда DPA хабар берди.

“Тобутда анъанавий дафн этиш ва кулини кўзада кўмиш билан амалга ошириладиган кремация (куйдириш) қаторида, келажакда махсус контейнерда “тезлаштирилган парчаланиш”, сўнгра инсон қолдиқларини тупроққа топшириш усули пайдо бўлади”, дейди ялпи мажлисда Адлия вазири Керстин фон дер Деккен.

Шу тариқа, Шлезвиг-Гольштейн Германияда дафн этишнинг ушбу янги шаклини қонунан мустаҳкамлаган биринчи ҳудуд бўлган.

Бундай дафн қилиш усулида вафот этган шахснинг жасади пичан, сомон ва ўсимликлар билан тўлдирилган ёпиқ контейнер ичига жойлаштирилади. Контейнер ёпилгач, тана ва ўсимлик аралашмаси таркибидаги микроорганизмлар контейнер ичидаги ҳароратни кўтаради, натижада органик моддалар 30–50 кун ичида чириндига (гумусга) айланади. Суяк ва тишлар парчаланмайди, шу сабабли кейинчалик улар майдаланиб, ҳосил бўлган гумусга аралаштирилади. Сўнг ушбу аралашма табиий матога ўралиб, қабрга қўйилади.

Дафн этишнинг ушбу янги тури Лейпциг университети Суд тиббиёти институтининг илмий кузатуви остида қарийб икки йил давомида синовдан ўтказилган. Адлия вазирининг сўзларига кўра, бу усул билан 76 та дафн маросими ўтказилган. Тадқиқот ҳисоботлари ва натижалари ушбу методнинг хавфсиз эканлигини тасдиқлаган.

Германиядаги протестант ва католик черковлари дафн этишнинг ушбу янги усулини “сўнгги йўлга кузатишнинг муносиб ва масъулиятли шакли” деб ҳисобламоқда.

АҚШнинг бир қатор штатларида ҳам бу методга рухсат берилган бўлиб, у ерда “табиий органик редукция” ёки инсон танасини компостлаш деб аталади.

Эслатиб ўтамиз, аввалроқ жорий йил апрель ойининг охирида Қозоғистон ва Марказий Осиёдаги биринчи крематорий иш бошлагани, бироқ кремация учун ариза топшириш жараёни ҳалигача тартибга солинмагани ҳақида хабар берилган эди.