Кеча, 7 июль куни Анқарада бўлиб ўтаётган НАТО саммити доирасида Туркия Президенти Ражаб Тойиб Эрдўған расмий кутиб олиш маросимидан сўнг АҚШ Президенти Дональд Трамп билан ўзаро учрашув ўтказди. Бу ҳақда TRT Haber хабар берди.
Учрашувда Трамп турли мавзуларда гап очган ҳамда унга берилган саволларга эркин ва очиқ жавоб берган. АҚШ етакчиси берган баёноти давомида Россия Президенти Владимир Путин билан мулоқоти ва умуман, Россия–Украина уруши масаласи ҳақида ҳам тўхталиб ўтган.
“Президент Путин билан жуда яхши суҳбатлашдим. Путин муҳтарам Эрдўғаннга ҳам катта ҳурмат билан қарайди. У билан гаплашганимдан кейин дарҳол Президент Зеленский билан ҳам суҳбатлашдим”, деган Трамп.
Унинг сўзларига кўра, икки мамлакат раҳбарлари ҳам келишувга эришишни истайди. Улар ҳам бу урушнинг яна шунча давом этишини хоҳламайди.
“Бирор ечим пайдо бўлади. Муҳтарам Президент ҳам бу жараёнда ёрдам бермоқда. Мен “саккизта урушни тугатамиз”, деган эдим ва буни ҳам тугатишга ўхшаяпмиз. Ҳозирча бундай имконият бор. Албатта, баъзан урушлар энг кутилмаган пайтда бошланиши ҳам мумкин”, деган АҚШ раҳбари.
Дональд Трампнинг таъкидлашича, у бутун ҳаёти давомида келишувлар тузган, музокараларга воситачилик қилган. Шу сабабли Президент бу масалани ҳам ҳал қилишга ишонишини айтган. Шунингдек, у Украина урушидаги ҳалок бўлганлар ҳақида ҳам гапирган.
“Ўтган ойда асосан ҳарбийлардан иборат 35 минг киши ҳалок бўлди. Ундан аввалги ойда 24 минг, яна олдинги ойда 47 минг, ундан аввал эса 29 минг киши ўлган. Фақат ўтган ойнинг ўзида 35 минг ёш инсон, асосан ҳарбийлар ҳалок бўлди. Бу ақлга сиғмайдиган ҳолат”, деган Трамп.
Дональд Трамп баёноти давомида Украина урушида аввалги президент Байден ҳукумати Украинага бепул қурол берганини эслаб, уни танқид остига олган. Ўзи эса энди қуролларни пуллаётганини билдирган.
“Кўп нарса ўзгарди. Бу Америкага тўғридан тўғри таъсир қилмайди. Байден юзлаб миллиард долларлик қурол-яроғни бепул берарди. Мен эса бугун уларни адолатли нархда сотяпман. Биз уларни Европа Иттифоқига сотамиз, улар эса ҳақини тўлайди. Мен эса фақат одамларнинг ҳаётини сақлаб қолишни хоҳлайман.
АҚШ раҳбари урушдан Қўшма штатларга катта зарар йўқлигини айтган. Унинг сўзларига кўра, уруш кўп нарсани ўзгартирди ва бу янги технологиялар уруши.
“Биз Европага ёрдам беряпмиз, аммо бу бизга таъсир қилмайди. Орамизда океан бор. Бироқ фронтларда бўлаётган воқеаларга қараб туролмайман. Энди бу дронлар урушига айланди. Бу янги технологиялар уруши. Биз дронлар бўйича дунёда энг илғор давлатмиз. Энг мукаммал дронларга эгамиз”, деб айтган Трамп.
Унинг айтишича, Пентагон раҳбари Пит Ҳегсет Трампга урушдаги воқеийликлардан олинган кадрларни улашиб туради.
“Бироқ бу уруш қанчалик шафқатсиз эканини ҳамма кўриб турибди. Расмларни кўрганимда... Мана шу ердаги дўстимиз Пит менга доим суратлар юборади, мен эса унга: “Пит, мен буларни кўришни истамайман”, дейман. Мен бундай манзараларни ҳеч қачон кўрмаганман. Бу ҳақиқий қирғин. Бу тугаши керак”, дейди АҚШ Президенти.
Эслатиб ўтамиз, 4 июль куни Россия Президенти Владимир Путин ва АҚШ етакчиси Дональд Трамп телефон орқали мулоқот ўтказганди. Қарийб бир ярим соат давом этган суҳбат ҳақида Россия Президентининг ёрдамчиси Юрий Ушаков изоҳ берганди.
“Президентлар, табиийки, Украина инқирозини ҳал қилиш мавзусига ҳам тўхталиб ўтдилар. Америка етакчиси ҳарбий ҳаракатларни тезроқ тугатишга ҳамда инқирозни бартараф этиш бўйича тинчлик йўлларини излашга кўмаклашишга тайёрлигини яна бир бор тасдиқлади. Унинг махсус вакиллари Стив Уиткофф ва Жаред Кушнер воситачилик саъй-ҳаракатларини давом эттирадилар ва қулай вақтда Москвага келишга тайёр бўлишади”, деганди Юрий Ушаков.
