Шимолий Корея АҚШнинг Япониядаги ҳарбий қўмондонлиги кенгайтирилаётганини танқид қилиб, Корея яриморолида қуролли тўқнашув юз бериши энди эҳтимол эмас, балки вақт масаласи эканини билдирди. Бу ҳақда Шимолий Корея Давлат ахборот агентлиги (KCNA) кеча, 30 июль куни эълон қилган мақоласида сўз боради.

Мақолада АҚШ Қуролли кучларининг Япониядаги қўмондонлиги штаби шахсий таркибининг кўпайтирилиши уни тўлақонли “уруш қўмондонлиги”га айлантираётгани таъкидланган. Шунингдек, Вашингтон Япониянинг Ўзини ўзи мудофаа қилиш кучларини Осиё–Тинч океани минтақасидаги эҳтимолий можарога тайёрлаётганликда айбланган.

Бу баёнот АҚШ Қуролли кучларининг Япониядаги қўмондони генерал-лейтенант Стивен Жостнинг “Asahi” газетасига берган интервьюсидан кейин янграган. Унинг айтишича, қўмондонликнинг бош штабидаги шахсий таркиб сўнгги бир йилда 215 нафарга кўпайтирилиб, қўмондонлик вазифаларини кучайтириш ва АҚШ иттифоқчилари билан мувофиқлашувни яхшилаш мақсад қилинган.

KCNA сўнгги вақтларда АҚШ, Жанубий Корея ва Япония ўртасидаги ҳарбий ҳамкорлик минтақадаги кескинликни кучайтирганини билдирган. Агентликка кўра, Корея яриморолида можаро юз берса, АҚШнинг Япониядаги қўмондонлиги у ерга биринчи бўлиб юбориладиган қўшимча кучлардан бири бўлади.

Шунингдек, таҳририй мақолада Вашингтон “ҳарбий авантюризм”да айбланиб, айнан шу сиёсат Шимолий Кореянинг ядровий салоҳиятини тийиб туриш воситаси сифатида ривожлантиришини оқлаши айтилган.

Бу KCNA томонидан жорий ойда АҚШ, Япония ва Жанубий Кореяни танқид қилган тўртинчи мақола ҳисобланади. Шимолий Корея расмийлари ҳам бир неча марта ушбу уч давлатнинг ҳарбий ҳамкорлиги ва Пхеньян “душманона сиёсат” деб атаётган ҳаракатларини қоралаб чиққан.

Эслатиб ўтамиз, аввалроқ Шимолий Корея етакчиси Ким Чен Ин мамлакатнинг ракета дастурини модернизация қилиш ва Жанубий Корея билан чегарадаги ўт очиш қудратини кучайтириш доирасида ўтказилган муҳим қурол-яроғ синовларини шахсан кузатган эди.