Камерун Президенти Поль Бийя 2 ойдан бери мамлакатда кўринмаяпти. Унинг узоқ вақт давомида чет элда қолаётгани Президентнинг соғлиғи ва мамлакат бошқарувида бўшлиқ юзага келиши мумкинлиги ҳақидаги хавотирларни кучайтирмоқда. Бу ҳақда “Associated Press” хабар берди.

Қайд этилишича, 1982-йилдан буён Камерунни бошқариб келаётган 93 ёшли Бийя жорий йилнинг 7 июнь куни мамлакатни тарк этган. Президент маъмурияти унинг сафарини Европадаги қисқа муддатли шахсий ташриф дея изоҳлаган. Кейинчалик ҳукумат унинг Швейцарияда эканини тасдиқлаган.

Бийя 2025 йил октябрь ойида бўлиб ўтган президентлик сайловида ғалаба қозониб, мамлакатни бошқаришдаги саккизинчи муддатини ноябрь ойида бошлаган. Бироқ у сайловдан кейин узоқ вақт давомида мамлакатда бўлмаган.

Президентнинг соғлиғи билан боғлиқ турли тахминлар аввал ҳам пайдо бўлган. Бийя сўнгги йилларда кўп вақтини Европа давлатларида, хусусан, Франция ва Швейцарияда ўтказиб келади. Унинг мамлакатдан узоқда бўлган даврларида бошқарувнинг муҳим қисми ҳукмрон партия вакиллари ва оила аъзоларига топширилади.

Камерун Конституциясида президентнинг мамлакатни бир неча ойга тарк этиши аниқ тақиқланмаган. Шу билан бирга, мамлакатда вице-президент лавозими мавжуд эмас. Бу ҳолат мухолифат вакилларининг кескин танқидларига сабаб бўлмоқда.

Маҳаллий экспертлар президентнинг соғлиғи унинг мамлакатни бошқариш қобилиятига таъсир қилаётган бўлиши мумкинлигини таъкидламоқда.

Поль Бийя Камерун Президенти лавозимига 1982 йилда, мамлакатнинг биринчи президенти Аҳмаду Аҳиджо истеъфога чиққач келган. 2008 йилда Конституцияга киритилган ўзгартириш билан президентлик муддати бўйича чекловлар бекор қилинган.

Агар Бийя амалдаги президентлик муддатини тўлиқ якунласа, у лавозимини қарийб 100 ёшида тарк этади.

Эслатиб ўтамиз, аввалроқ Камерунда 92 ёшли Поль Бийя саккизинчи марта президентлик лавозимига қайта сайлангани ҳақида хабар берилган эди.