Туркия Адлия вазирлиги Исроил Бош вазири Биньямин Нетаньяхуга нисбатан Интерпол орқали “қизил билдиришнома” чиқаришни сўради. Бу ҳақда “Anadolu” хабар берди.

Туркиянинг бундай қарорига Истанбул Олий жиноий судининг жорий йилнинг июль ойида Нетаньяхуни ҳибсга олиш ҳақида чиқарган ордери сабаб бўлган. Туркия Адлия вазири Оқин Гюрлекнинг айтишича, суд Нетаньяху ва Исроил ҳарбий-денгиз кучлари қўмондони Афек Московични бир халқни йўқ қилишга уриниш, инсониятга қарши жиноятлар ва қийноқларда айблаб, ҳибсга олиш ҳақида ордер берган.

Гап Ғазога гуманитар ёрдам олиб боришга уринган “Global Sumud Flotilla” (GSF) инсонпарварлик флотилияси фаолларининг ҳибсга олиниши ҳақида кетмоқда.  Ўтган йилнинг кузида Исроил ҳарбийлари Ғазо соҳилига етиб боришига бир неча соат қолган флотилияни тўхтатган. Ўшанда қарийб 70 киши ҳибсга олинган. Улар орасида швециялик экологик фаол Грета Тунберг ҳам бўлган. У кейинчалик депортация қилиш учун портга олиб кетилган.

“Reuters” маълумотига кўра, Туркиянинг бу иши жами 35 кишига нисбатан очилган жиноят иши доирасида олиб борилмоқда.

Флотилия ташкилотчилари Исроил ҳаракатларини ноқонуний деб атаган. Исроил Ташқи ишлар вазирлиги эса флотилия ҲАМАС билан алоқадор эканини билдирган. Исроил томони Туркиянинг айбловларини рад этган.

Туркия Адлия вазирлиги энди Интерпол орқали Нетаньяхуни халқаро қидирувга бериш учун “қизил билдиришнома” чиқарилишини сўрамоқда. Бундай билдиришнома шахсни топиш ва вақтинча ҳибсга олишни сўраш учун юборилади. Бироқ Интерполнинг ўзи ҳеч бир давлатни биронта шахсни ҳибсга олишга мажбурлай олмайди. Ташкилот аввал Туркиянинг сўровини кўриб чиқади, шундан кейин билдиришнома чиқариш масаласини ҳал қилади.

Нетаньяҳунинг идораси Туркиянинг бу ҳаракатини танқид қилиб, уни ҳеч қандай натижа бермаслигини билдирган.

Эслатиб ўтамиз, аввалроқ Нью-Йорк шаҳри мэри Зоҳрон Мамдони Исроил Бош вазири Биньямин Нетаньяҳу шаҳарга ташриф буюрган тақдирда уни ҳибсга олдириш бўйича мустақил ҳуқуқий ваколатга эга эмаслиги ҳақида маълум қилганди.