АҚШ Президенти Дональд Трамп Россия ва Украина энергетика объектларига ҳужумларни тўхтатиш бўйича келишувга эришганини маълум қилди. Бироқ Украина Президенти Владимир Зеленский келишув тафсилотларини кутаётганини айтди. Бу ҳақда “Reuters” хабар берди.

Трампнинг Truth Social ижтимоий тармоғидаги саҳифасида ёзишича, сулҳ дарҳол кучга кириши керак.

“Россия ва Украина ўртасидаги урушда энергетика соҳасида ўт очишни тўхтатиш дарҳол кучга киради. Ҳар икки томон бунга рози бўлди. Уни бузманг!” деб ёзган АҚШ Президенти.

Бироқ Москва ва Киев ҳозирча бундай келишувга эришилганини расман тасдиқламаган.

Зеленский эса Украина сулҳни қўллаб-қувватлашини, аммо Россия ҳам бунга рози бўлиши кераклигини билдирган. Унинг айтишича, Киев Америка томонидан келишув тафсилотлари тақдим этилишини кутмоқда.

Шу билан бирга, Украина раҳбари Россия кучлари энергетика инфратузилмасига ҳужумларни давом эттираётганини айтган. Хусусан, Трамп сулҳ эълон қилганидан кейин Украинанинг иккинчи йирик шаҳри Харьковдаги иссиқлик ва электр энергияси ишлаб чиқарувчи қўшма корхонага зарба берилган.

Reuters’нинг вазиятдан хабардор манбага таяниб хабар беришича, АҚШ Украина ҳужумларини тўхтатишга кўндириш учун Киевга разведка маълумотларини узатиш ва қурол етказиб беришни тўхтатиш билан таҳдид қилган. Манбанинг айтишича, Зеленский Трамп билан юзага келган зиддиятни юмшатиш масаласини Европа етакчилари билан муҳокама қилмоқда.

Аввалроқ, Трамп Зеленскийни Россия нефтини қайта ишлаш заводларига ҳужумларни тўхтатишга чақириб, Украинада янги сайловлар ўтказилиши кераклигини ҳам айтган эди. АҚШ Президенти Украина раҳбари Москва билан келишувга эришиш учун бир неча имкониятни бой берганини таъкидлаганди. Бунга жавобан Зеленский Россия Президенти Владимир Путин 60 кунлик сулҳга рози бўлса, Украинада сайлов ўтказишга тайёрлигини билдирган. Украина қонунчилигига кўра, ҳарбий ҳолат даврида сайлов ўтказиш тақиқланган.

“Путинга айтинг, бизга икки ой, 60 кунлик тўлиқ сулҳ беринг, шунда биз сайловларни ташкил қиламиз”, деган Зеленский.

Эслатиб ўтамиз, аввалроқ Россия ҳукумати дизель ёнилғиси экспортига қўйилган тақиқ қисман бекор қилинганини маълум қилган эди. Трампнинг Путин билан келишуви ҳам айнан дизель ёнилғиси етказиб бериш ва унга қўйилган чекловларни юмшатиш билан боғлиқ. Шунингдек, Зеленский ушбу келишувни кескин қоралаб, “очиқ заифлик белгиси” деб атаган эди.