Ҳормуз бўғози яқинида сўнгги 24 соат ичида снаряд ҳужумига учраган иккита кема чўкиб кетди. Ҳодисалардан бирида экипажнинг бир аъзоси ҳалок бўлди, иккинчи кемадаги 21 нафар экипаж аъзоси эса қутқариб қолинди. Бу ҳақда “Reuters” хабар берди.

Маълум қилинишича, Сингапур байроғи остида сузган GFS Pride контейнер ташувчи кемаси жорий йилнинг 13 октябрь куни Ҳормуз бўғози орқали ҳаракатланаётган вақтда снаряд билан ҳужумга учраган. Кема шикастланиб, бортида ёнғин чиққан ва кейинчалик чўкиб кетган. Сингапур денгиз ва порт маъмурияти маълумотига кўра, экипажнинг 21 нафар аъзоси хавфсиз эвакуация қилинган. Ҳеч ким жароҳатланмаган.

Иккинчи кема – Антигуа ва Барбуда байроғи остида сузган Cape Dao қуруқ юк ташувчи кемаси. У жорий йилнинг 23 сентябрь куни снаряд билан ҳужумга учраган эди. БМТнинг Халқаро денгиз ташкилоти маълумотларига кўра, кема кеча, 14 октябрь куни Ҳормуз бўғози яқинида чўкиб кетган. Ҳужум пайтида экипажнинг бир аъзоси ҳалок бўлган, қолганлар эвакуация қилинган.

Қайд этилишича, GFS Pride ва Cape Dao АҚШ ва Эрон ўртасидаги уруш жорий йилнинг 28 февраль куни бошланганидан бери чўкиб кетган иккинчи ва учинчи кемалар бўлди.

“Reuters”га кўра, сўнгги 10 кун ичида Ҳормуз бўғози атрофида кемаларга ҳужумлар кескин кўпайган. Эрон АҚШнинг портларига қўйган блокадаси ва кучайтирилган санкцияларига жавобан зарбаларни ошираётганини билдирган.

Урушдан олдин дунё бўйича нефть ва суюлтирилган табиий газ савдосининг қарийб бешдан бир қисми Ҳормуз бўғози орқали амалга оширилган. Шу сабабли ушбу ҳудудда кемаларга ҳужумлар кучайиши жаҳон энергетика таъминоти хавфсизлиги юзасидан хавотирларни оширмоқда.

“Reuters” суҳбатлашган икки нафар юқори мартабали эронлик расмийнинг айтишича, Эрон бўғоздан ўтаётган кемаларга қарши янги тактикаларни қўлламоқда. Уларнинг сўзларига кўра, Теҳрон нефть нархларини юқори даражада ушлаб туриш ва АҚШдаги оралиқ сайловларга таъсир кўрсатишни ҳам кўзламоқда.

Денгиз хавфларини бошқариш билан шуғулланувчи MARISKS компанияси тижорат кемаларига таҳдид фақат нефть ташувчи танкерларга тааллуқли эмаслигини билдирган. Компания контейнер ташувчи ва қуруқ юк кемалари ҳам жиддий зарар кўраётганини қайд этган.

Эслатиб ўтамиз, аввалроқ АҚШ Қуролли кучлари сўнгги 12 ҳафта ичида Эронга нисбатан жорий этилган денгиз блокадасини бузишга уринган ёки Эрон Ислом инқилоби қўриқчилари корпуси билан боғлиқ бўлган 13 та тижорат кемасини йўқ қилгани ҳақида хабар берилган эди.