Беларусь Россиянинг Калининград, Санкт-Петербург, Москва вилояти ва қисман Москва шаҳрини маҳсулотлар билан таъминлашни ўз зиммасига олиши мумкин. Мамлакат Президенти Александр Лукашенко совет давридаги ушбу амалиётни қайта тиклашни таклиф қилди. Бу ҳақда “Gazeta.ru” хабар берди.

Лукашенко бу таклифни Минскда Санкт-Петербург губернатори Александр Беглов ва Россиянинг Беларусдаги элчиси Борис Гризлов билан учрашувда билдирган. Унинг айтишича, совет даврида Беларусь Ленинград ва Калининград вилоятларида етишмайдиган озиқ-овқат маҳсулотларини ишлаб чиқариб, етказиб беришга масъул бўлган.

Совет давридаги амалиётга қайтиш вақти келди. Беларусь Калининград, Санкт-Петербург, Москва вилояти ва қисман Москвани маҳсулотлар билан таъминлар эди”, деган Лукашенко.

У Беларусь ва Ленинград ўртасидаги ҳамкорлик фақат маҳсулот етказиб бериш билан чекланмаганини ҳам таъкидлаган. Ўша даврда Ленинграддан мутахассислар Минскка бориб, республикада муайян соҳаларни ривожлантиришга ёрдам берган.

Учрашувда Беларусь ва Санкт-Петербург ўртасидаги иқтисодий алоқалар ҳам муҳокама қилинган. Бегловнинг маълум қилишича, Санкт-Петербургда Беларусьда ишлаб чиқарилган қарийб 2 мингта автобусдан фойдаланилади. Яқинда шаҳар 101 та электробус ҳам харид қилган.

Унинг қайд этишича, Беларусь Санкт-Петербургнинг энг йирик учта савдо ҳамкоридан бири ҳисобланади. Сўнгги икки йилда томонлар ўртасидаги товар айирбошлаш ҳажми ҳар йили 3 миллиард доллардан ошган, 2026 йилнинг биринчи ярмида эса яна 7 фоизга ўсган. Шунингдек, Санкт-Петербургда Беларусь маҳсулотларининг тўртта расмий дўкони ишламоқда. 2027 йилда Беларусь техникаси марказини қуриш режалаштирилган.

Россия Президенти Владимир Путин ҳам аввалроқ икки мамлакат ўртасидаги савдо ҳажми рекорд даражага етганини билдирган. Унинг маълумотига кўра, 2025 йилда товар айирбошлаш қарийб 52 миллиард долларни ташкил этган.

Шу билан бирга, икки мамлакат ўртасидаги савдода айрим қийинчиликлар ҳам мавжуд. Лукашенко Россияда товарларни кутишни тасдиқлаш тизими жорий этилиши Беларусь экспортчилари учун ортиқча бюрократик тўсиқлар келтириб чиқариши мумкинлигидан хавотир билдирган. Сентябрь ойида Беларусь Давлат божхона қўмитаси раҳбари Владимир Орловский ҳам Россия-Беларусь чегарасидаги назорат билан боғлиқ экспортчилар учун айрим ноқулайликлар борлигини айтган.'

Унинг таъкидлашича, бу масала бўйича томонлар савдо жараёнларини соддалаштиришга қаратилган ҳужжатларни ишлаб чиқмоқда.

Эслатиб ўтамиз, аввалроқ Беларусь урушга тайёрланаётгани, аммо уни ҳар томонлама олдини олишга ҳаракат қилаётгани ҳақида хабар берилган эди.