Халқаро ҳамкорлик: Урганч давлат университети профессор-ўқитувчилари Чехияда малака оширди

Жорий йилнинг 1–18 декабрь кунлари Абу Райҳон Беруний номидаги Урганч давлат университети профессор-ўқитувчилари Чехия Республикасида хизмат сафарида бўлиб, нуфузли халқаро дастурлар доирасида малака ошириб қайтдилар.

Хусусан, университетнинг Иқтисод кафедраси доценти Б.Қўзибоев ҳамда Туризм кафедраси ўқитувчиси О.Тураев Чехиянинг Ческе-Будеёвице шаҳрида жойлашган Жанубий Богемия университетида “Visiting Professor” ҳамда “Erasmus+ International Credit Mobility (ICM)” дастурлари асосида билим ва тажрибаларини бойитдилар.

Ташриф давомида улар халқаро академик ва методик учрашувларда фаол иштирок этиб, иқтисодиёт ва туризм йўналишлари бўйича илғор хорижий тажрибалар билан танишдилар. Шунингдек, таълим жараёнини такомиллаштириш, илмий-тадқиқот ишларини ривожлантириш ва ўқув-методик ҳамкорликни кучайтириш бўйича ўзаро тажриба алмашуви амалга оширилди.

Шу билан бирга, Жанубий Богемия университети билан ҳамкорликда Чехия туризм бошқармасининг DMO (Destination Management Office) агентлиги мутахассиси Матей Пейшар ҳамда Мексика Миллий автоном университети илмий тадқиқотчиси, доктор Люси Креспо Ступкова билан учрашувлар ўтказилди. Ушбу мулоқотларда ҳудудий туризмни самарали бошқариш, маҳаллий тадбиркорлар ва туризм операторлари билан ишлаш механизмлари, шунингдек, туристик йўналишларни ривожлантириш масалалари муҳокама қилинди.

Қолаверса, Жанубий Богемия университети Иқтисодиёт факультети декан ўринбосари доктор Владимир Кадлец ҳамда факультет профессори Камил Пича билан бўлиб ўтган учрашувларда икки олий таълим муассасаси ўртасидаги академик ҳамкорликни янада кенгайтириш, туризм соҳасида қўшма лойиҳаларни амалга ошириш, илмий-тадқиқот ва таълимий дастурларни йўлга қўйиш, шунингдек, ўқитувчи ва талаба алмашинуви дастурларини ривожлантириш бўйича келгуси режалар белгилаб олинди.

Мазкур хизмат сафари Урганч давлат университетининг халқаро нуфузини ошириш, таълим сифатини яхшилаш ҳамда жаҳон тажрибасини ўқув жараёнига жорий этишда муҳим аҳамият касб этди.