АҚШ урушни танлади – Пезешкиён

Эрон Президенти Масъуд Пезешкиён АҚШ музокараларни давом эттириш учун “камситувчи шартлар” қўяётганини ва Эрон бундай шартларни қабул қилмаслигини маълум қилди. Унинг таъкидлашича, Эрон на таҳқирга, на заифликка йўл қўймайди. Бу ҳақда у Теҳронда бўлиб ўтган, сиёсий элита вакиллари, таниқли жамоат арбоблари ва партия котиблари иштирокидаги учрашувда сўз очди.

Президент санкциялар масаласига тўхталар экан, Эрон илгари АҚШ билан музокаралар олиб боргани ва келишувга тайёр бўлганини, бироқ Вашингтон уруш йўлини танлаб, битимни бузганини айтди. Унинг сўзларига кўра, ҳозир АҚШ музокараларни давом эттириш учун Эронни камситувчи шартларни илгари сурмоқда ва у бундай таклифларни қабул қилмайди.

Пезешкиён Эрон қарама-қаршиликка интилмаслигини, Теҳрон бир неча бор ядро қуроли яратмаслигини эълон қилганини ва ҳар қандай текширувга тайёр эканини таъкидлаган. Шу билан бирга, у қарши томон Эронни таъсир воситаларидан маҳрум этиш ва мамлакатни сионистик режим қаршисида заифлаштиришга уринаётганини билдирган.

Президентнинг айтишича, Эрон тинчлик тарафдори, аммо қўрқитиш ва босимни қабул қилмайди. У Эрон ташқи сиёсатида муносиб ҳамкорлик билан мажбурий бўйсуниш ўртасида аниқ чегара борлигини қайд этган.

Пезешкиён агар бошқа томон Эроннинг ядро қуролига эга бўлишидан чин дилдан хавотирда бўлса, музокараларга тайёр эканини айтган. Бироқ у Эроннинг мудофаа ракета салоҳияти бўйича ҳар қандай муҳокамани қатъиян рад этган.

Шунингдек, Президент ҳукумат тинчлик, минтақавий барқарорлик ва қўшни давлатлар билан ҳамкорликни мақсад қилганини, аммо камситувчи талабларни ҳеч қачон қабул қилмаслигини таъкидлаган.
У ҳукумат аъзоларининг сайловларда иштирок этишга чақируви режалаштириш етишмаслигидан далолат беради, деган фикрларни инкор этиб, аниқ стратегик дастурлар мавжуд ва улар босқичма-босқич амалга оширилаётганини билдирган.