“Эронга янги раҳбарият излаш вақти келди” — Трамп

АҚШ президенти Дональд Трамп 17 январь куни берган баёнотида Эрон олий раҳнамоси Оятуллоҳ Али Хоманаийни 37 йиллик ҳукмронлигига чек қўйишга чақирди. Бу ҳақда у Politico нашрига берган интервьюсида маълум қилди.

Трамп ўз интервьюсида Эронда режимни ағдаришга қаратилган кенг кўламли намойишлар бир оз пасайган бўлса-да, мамлакатда бошқарув ўзгариши шартлигини таъкидлади.

“Эронга янги раҳбариятни излаш вақти келди”, деди АҚШ президенти.

Маълумотларга кўра, сўнгги уч ҳафта ичида мамлакат бўйлаб минглаб намойишчилар ўлдирилган. Бу эса Трампнинг бир неча бор ҳарбий интервенсия билан таҳдид қилишига сабаб бўлган. Ўтган сешанба, яъни 13 январь куни у эронликларни намойишларни давом эттиришга ва давлат муассасаларини эгаллашга чақириб, ёрдам йўлда эканини айтган эди.
Бироқ орадан бир кун ўтиб, президент ўз риторикасини ўзгартирди ва қотилликлар тўхтагани ҳақида маълумот олганини билдирди. Шанба, 17 январь куни Эронга қарши эҳтимолий ҳарбий операция кўлами ҳақидаги саволга жавоб берар экан, Трамп шундай деди:

“Хоманаий қабул қилган энг яхши қарор — икки кун аввал 800 дан ортиқ одамни осиб ўлдирмагани бўлди”.

Трампнинг ушбу кескин чиқишлари Хоманаийнинг кескин баёнотларидан сўнг янгради. У АҚШ президентини Эрондаги қонли зўравонликлар ва тартибсизликларда айблаган эди.

“Биз Америка президентини Эрон халқига етказган талафотлари, зарарлари ва туҳматлари учун айбдор ва жиноятчи деб биламиз”,деб ёзган эди олий раҳнамо.

“У касал одам”
Ушбу постлар билан танишган Трамп Теҳрон ҳукмдорлари мамлакатни фақат репрессия ва зўравонлик билан бошқараётганини айтди.

“У мамлакат раҳбари сифатида давлатни бутунлай вайрон қилганликда ва мисли кўрилмаган зўравонлик қўллаганликда айбдор. Мамлакатни бошқариш учун раҳбарият ўз давлатини худди мен АҚШни бошқараётганимдек тўғри идора қилишга эътибор қаратиши керак. Ҳокимиятни сақлаб қолиш учун минглаб одамларни қирмаслиги лозим. Раҳбарлик — бу қўрқув ва ўлим эмас, балки ҳурмат демакдир”, дея қўшимча қилди Трамп.