АҚШ Россияга қарши янги санкциялар тайёрлади, аммо ҳозирча уларни жорий этмаяпти - Bloomberg

АҚШ ҳукумати Россияга қарши янги санкцияларни тайёрлаган, аммо ҳозирча уларни жорий этишни режалаштирмаяпти. Бу ҳақда Европа дипломатларига асосланиб маълумот Bloomberg агентлиги хабар қилмоқда.

Сўнгги ва ягона йирик санкциялар Дональд Трамп маъмурияти томонидан 2025 йилнинг октябрида “Лукойл” ва “Роснефт” компанияларига нисбатан санкциялар киритилганди. Европа ҳам навбатдаги, 20-санкциялар пакетини тайёрламоқда. У уруш бошланганининг тўрт йиллигига тўғри келиши кутилмоқда. Унда Россиянинг “соя флоти”га қарши чекловлар ҳам бўлади, бироқ агентлик суҳбатдошлари фикрича, бу чоралар Россиянинг Украинадаги ҳаракатларига муносиб жавобдан кўра “шинани секин тешиш”га ўхшаб кетади.

Манбаларнинг қайд этишича, Россия жанг майдонида ҳал қилувчи ютуқларга эриша олмагач, Украинани ноқулай битимни қабул қилишга мажбурлаш учун фуқаролик ва энергетика иншоотларига зарба бермоқда.

Январь ойи охирида Трамп қаттиқ совуқ туфайли Владимир Путиндан бир ҳафта давомида Киев ва Украинанинг бошқа шаҳарларини бомбардимон қилмасликни сўраганди. Кейинчалик Кремль Трамп Киевга 1 февралгача зарба бермасликни сўраганини ва Путин бу илтимосни қабул қилганини қўшимча қилди.
3 февраль кечаси Россия ҳарорат минус 20 даража бўлишига қарамасдан Украина энергетикасига яна бир кенг кўламли зарба берди. Ҳужум оқибатида Киев ва Харьковдаги турар-жой бинолари яна иситиш тизимисиз қолди. Трампдан ушбу ҳужум ҳақида сўралганда, у Путин “сўзида турганини” ва “якшанбадан якшанбагача муддатга риоя қилганини” айтди.
Аввалроқ Украина президенти Владимир Зеленский ўзининг Telegram каналида уруш тугаши учун тинчлик сари зарур қадамлар ташлашга тайёрлигини маълум қилганди.

• Россия билан музокаралар: нималар маълум?

Шу ҳафта, 4-5 февраль кунлари Абу-Дабида Украина, АҚШ ва Россия иштирокидаги уч томонлама музокараларнинг навбатдаги раунди бўлиб ўтади. Бу музокараларга АҚШ номидан президентнинг махсус вакили Стив Уиткофф қўшилиши керак.
23-24 январь кунлари БААда бўлиб ўтган музокаралардан сўнг Ғарбнинг етакчи оммавий ахборот воситалари Донбасснинг келажаги масаласи ҳал этилмагани ҳақида ёзди. АҚШ Россия билан тинчлик шартномаси имзолангандан кейингина Украинага хавфсизлик кафолатларини беришга тайёр.
Шу билан бирга, АҚШда Украина Россия кучлари ҳарбий йўл билан эгаллай олмаган Донецк вилояти ҳудудидан қўшинларини олиб чиқиши керак, деган позиция илгари сурилмоқда.