Шовотда назорат кучайтирилмоқдами? Чегара постларида тартиб ва тирбандлик масаласи қандай ҳал этилмоқда?

Хоразм вилояти божхона бошқармаси бошлиғи Ш.Тўраевнинг “Шовот” ҳамда “Шовот чегараолди савдо зонаси” чегара божхона постларига ташрифи мазкур ҳудудлардаги иш жараёнларини яна бир бор таҳлил қилишга замин яратди.

Дастлаб “Шовот” чегара божхона постида амалга оширилаётган ишлар кўздан кечирилди. Мазкур пост орқали бир кунда ўртача 1000 нафардан ортиқ фуқаро, шунингдек 100 дан зиёд юк ва енгил автотранспорт воситалари ҳаракатланиши қайд этилди. Бу эса пост фаолиятида юқори юклама мавжудлигини кўрсатади.

Ўрганишлар давомида божхона назоратини самарали ташкил этиш, транспорт воситалари тирбандлигининг олдини олиш ҳамда қонунбузилиш ҳолатларига йўл қўймаслик бўйича масъулларга аниқ топшириқлар берилди.

Шундан сўнг раҳбар “Шовот чегараолди савдо зонаси” постида ҳам бўлиб, у ерда яратилган шароитлар билан танишди. Мазкур ҳудуд орқали кунлик ўртача 5000 нафардан ортиқ фуқаролар ҳаракатланмоқда. Эътиборлиси, эркин савдо зонасида товарлар айланмаси кунига 1,1 миллиард сўмдан ошиб, ҳудуд иқтисодий фаоллик нуқтасига айланаётганини кўрсатмоқда.

Ўрганишлар якунида ходимларга қатор муҳим вазифалар юклатилди. Жумладан, фуқаролар ва тадбиркорлар учун янада қулай шарт-шароитлар яратиш, ортиқча бюрократик тўсиқларни бартараф этиш, айниқса тирбандликларнинг олдини олиш бўйича тизимли чораларни кучайтириш зарурлиги таъкидланди.
Шунингдек, хизмат жараёнларида ходимларнинг хушмуомалалиги, мурожаат қилувчиларга нисбатан очиқ ва самимий муносабатда бўлиши бугунги кун талаби экани алоҳида қайд этилди.

Энди савол туғилади: амалий ўзгаришлар қачон сезилади? Фуқаролар учун ҳақиқий енгиллик яратиладими ёки бу топшириқлар қоғозда қолиб кетмайдими?