Президент тадбиркорликни янги босқичга олиб чиқишнинг устувор йўналишларини белгилади

Президент Шавкат Мирзиёев 18 август куни Хива шаҳрида тадбиркорлар билан очиқ мулоқот ўтказиб, бизнесни ривожлантиришнинг янги устувор йўналишларини белгилаб берди.

Мулоқотда мамлакатнинг барча ҳудудларидан 25 мингга яқин тадбиркор иштирок этди. Қайд этилганидек, сўнгги беш йилда тадбиркорликни қўллаб-қувватлаш бўйича 84 та қонун, 861 та фармон ва қарор қабул қилинди. Бизнесга ажратилган кредитлар ҳажми қарийб 3 карра ошиб, 450 триллион сўмга етди.

Хоразмда ҳам тадбиркорлик учун янги имкониятлар яратилди. Қисқа даврда вилоятга 4 миллиард доллар хорижий инвестиция киритилиб, 10 мингта янги қувват ишга туширилди. Бугун вилоят иқтисодиётининг 72 фоизини кичик бизнес яратмоқда, экспортда унинг улуши 81 фоизга етган.

Мулоқотда тадбиркорларни қўллаб-қувватлаш бўйича 5 та асосий йўналиш белгиланди:

— бизнесни молиялаштиришнинг янги тизимини яратиш;
— ҳудудларда тадбиркорлик имкониятларини кенгайтириш;
— сунъий интеллект ва замонавий технологияларни бизнесга кенг жорий этиш;
— экспорт салоҳияти ва миллий брендларни ошириш;
— тадбиркорларга маъмурий босимни кескин камайтириш.

Шунингдек, кичик бизнес учун 200 миллион сўмгача гаровсиз кредит бериш, 10 миллиард сўмгача кредитларда контр-кафолат тизимини жорий этиш, сунъий интеллектни жорий қилган корхоналар харажатининг 50 фоизини қоплаш каби чоралар белгиланди.

Туризм соҳасида ҳам тадбиркорларни қўллаб-қувватлаш кучайтирилади. Меҳмонхона қуриш, реконструкция қилиш ва жиҳозлаш учун 50 миллион доллар ресурс ажратилади.

Президент Хоразм, Самарқанд ва Бухорода туризм, креатив индустрия ҳамда агросаноат брендларини ривожлантиришни асосий ўсиш нуқталари сифатида белгилади.

Йиғилиш якунида давлат раҳбари тадбиркорларни янги имкониятлардан самарали фойдаланиб, бизнесни кенгайтириш ва янги иш ўринлари яратишга чақирди.