Ёмғир ёғди — сув қаёққа кетади? Урганч кўчаларидаги кўлмаклар кимнинг ташвиши?

Бугун, 11 октябрь куни Хоразмнинг деярли барча ҳудудларида ёмғир ёғди. Куз ёмғири одатий ҳол, бироқ ҳар гал ёғингарчиликдан сўнг такрорланадиган манзара кўпчиликни ўйлантириб қўймоқда: вилоят маркази Урганч шаҳри ва туман марказларининг марказий кўчаларида ёмғир суви бир жойга йиғилиб, катта кўлмаклар ҳосил бўлмоқда.

Таҳририятимизга келиб тушган видеода ҳам айнан шундай ҳолат акс этган. Кўча четида тўпланган сув ҳеч қаёққа оқиб кетмайди, чунки унинг чиқиб кетиши учун мўлжалланган жойнинг ўзи йўқ. Бундай сув ё махсус техника ёрдамида олиб ташланади, ё қуёш чиқиб, ўз-ўзидан буғланиб кетгунига қадар кўча ўртасида қолиб кетади.

Оқибатда пиёдалар кўлмакларни айланиб ўтишга мажбур, ўтиб кетаётган автомобиллар сув сачратиб, йўловчиларнинг кийимини булғайди. Кўп кун турган сув йўл қопламасини емиради, асфальт ёрилиб, чуқурлар пайдо бўлади. Демак, бугунги кўлмак эртага янги таъмир харажати демакдир.

Ривожланган шаҳарларда ёмғир ва қор сувини чиқариб юбориш учун алоҳида ёмғир канализацияси, лоток ва дренаж тизимлари қурилади. Йўллар сув кўча четидаги панжарали қудуқларга оқиб тушадиган қияликда барпо этилади. Сўнгги йилларда эса ёмғир сувини яшил ҳудудлар ва тупроқ орқали шимдириб юборишга асосланган ечимлар ҳам кенг қўлланилмоқда.

Урганчда сўнгги йилларда кўплаб кўчалар қайта таъмирланди, янги асфальт ётқизилди, йўлаклар ва ободонлаштириш ишлари амалга оширилди. Бироқ ҳар ёмғирдан кейинги манзара бир саволни ўртага қўяди: бу ишларда ёмғир сувини чиқариб юбориш масаласи қай даражада инобатга олинган?

Жамоатчилик номидан тегишли ташкилотларга қуйидаги саволлар билан мурожаат қиламиз:

— Урганч шаҳри ва туман марказларида ёмғир сувини чиқариб юбориш тизими мавжудми? Мавжуд бўлса, у қай ҳолатда?
— Янги қурилган ва таъмирланган кўчаларда сув оқиб кетиши учун лоток ва қудуқлар назарда тутилганми?
— Ёғингарчилик пайтида сув тўпланадиган нуқталар рўйхати борми ва уларни бартараф этиш бўйича қандай режалар ишлаб чиқилган?
— Бу йўналишда яқин вақт ичида қандай ишлар амалга оширилиши кутилмоқда?

Қиш фасли яқинлашмоқда. Олдинда қор ва ёмғирли кунлар кўп. Агар масала ҳозирдан ҳал этилмаса, кўлмаклар музлаб, кўчалар пиёдалар ва ҳайдовчилар учун хавфли ҳолатга келиши тайин.

“Хоразм бугун” таҳририяти мазкур масала юзасидан шаҳар ҳокимлиги ва коммунал хизмат кўрсатувчи ташкилотларнинг расмий жавобини кутиб қолади. Жавоб олингач, уни ўқувчиларимизга етказамиз.