Хивада “Қовун сайли” — Хоразмнинг шарбатли анъанаси давом этмоқда

Хоразм воҳаси қадимдан ўзининг серқуёш далалари ва навли қовунлари билан машҳур. Ҳар йили ёз охирида Хива шаҳрида ўтказиладиган “Қовун сайли” фестивали бу бебаҳо бойликни нафақат юртимизга, балки дунёга намойиш этиб келмоқда. Бу йилги сайл 8–10-август кунлари бўлиб ўтади.

Анъанага айланган шарбатли сайл

Хива шаҳрида ўтказиладиган “Қовун сайли” фестивали Ўзбекистон бўйлаб қовунчиликни ривожлантириш, деҳқонларга кўмаклашиш ва ички ҳамда ташқи туризмни рағбатлантириш мақсадини кўзлайди. Бу йиллик анъанавий сайл Хива Полвон дарвоза олдидаги кенг Аллея майдонида ташкил этилиб, ўтган йили бу ерга юз минглаб меҳмонлар ташриф буюрган эди.

Ўтган йилги фестивалнинг ёрқин лаҳзалари

2024-йилги фестивал 60 та махсус павилёнда 100 дан ортиқ қовун навларини жамлаб, меҳмонларни танҳо Хоразмга хос лаззатлар билан таништирди. Турли туманлардан келган деҳқонлар ўз ҳосилларини нафақат сотди, балки танловларда ҳам қатнашди.

Танлов натижалари бўйича энг катта ва сифатли қовун етиштирган деҳқонлар қуйидаги тарзда тақдирланди:
 • Гранд Прих — Янгибозор туманининг моҳир деҳқони бош мукофот сифатида “Трекер” автомобилини қўлга киритди.
 • 1-ўрин — Урганч шаҳри деҳқони “Оникс” автомобили билан тақдирланди.
 • 2-ўрин — Хива туманидан қатнашган деҳқон “Дамас” автомобилини ютиб олди.
 • 3-ўрин — Урганч тумани, Хива шаҳри ва Қўшкўпир туманидан келган уч нафар иштирокчига ҳар бирига мотоцикл топширилди.

Шунингдек, қовунларни сақлаш, қайта ишлаш, қадимий навларни тиклаш, экспорт ва экологик етиштириш бўйича ҳам бир нечта махсус номинациялар бўйича диплом ва қимматбаҳо совғалар топширилди.

Фестивал давомида Хоразмга 30 мингга яқин хорижий сайёҳ, 400 мингга яқин маҳаллий меҳмон ташриф буюргани бу тадбирнинг қанчалик оммавий ва муҳим эканини кўрсатади.

Бу йил нималар кутмоқда?

Бу йилги “Қовун сайли”да ҳам юртимизнинг энг навли қовунлари тақдим этилади. Анъанага содиқ равишда миллий таомлар, ҳунармандчилик ярмаркалари, фолклор жамоалар чиқишлари, болалар ва катталар учун миллий ўйинлар ўрин олади. Энг асосийси, меҳмонлар янги ҳосилнинг ширин қовунларидан татиб кўриб, бевосита даладан олиб кетиш имкониятига эга бўлишади.