Боғот, Тупроққалъа, Хива, Урганч, Янгибозор туманларида зиплайн ва канатли парк қурилади.

Ўзбекистонда тадбиркорлик субектларининг тоғли ва чўл ҳудудларда зиплайн хизматлари ва канатли парк (тайпарк) экстремал туризм мажмуасини ташкил қилиш харажатларининг бир қисмини қоплаб берилади. 

Вазирлар Маҳкамаси қарори билан унинг тартиби тўғрисидаги вақтинчалик низом тасдиқлади. Ушбу низом 2025-йил 1-июлдан бошлаб 2027-йил 1-январга қадар амал қилади.

Унга кўра:

  тоғли ва чўл ҳудудларда умумий масофаси 200 метрдан кам бўлмаган зиплайн экстремал туризм мажмуасини ташкил қилиш харажатларининг бир қисмини қоплаш учун 100 миллион сўм;
  тоғли ва чўл ҳудудларда 150 кв метрдан кам бўлмаган канатли парк (тайпарк) экстремал туризм мажмуасини ташкил қилиш харажатларининг бир қисмини қоплаш учун 80 миллион сўм миқдорида бир марталик субсидия ажратилади;
Зиплайн хизматлари — пўлат арқоннинг икки учи махсус устунларга қотириб маҳкамланган аттрационда пўлат арқон бўйлаб ердан кўтарилган ҳолда тортишиш кучи таъсирида ҳаво орқали махсус мослама ёрдамида тушиш бўйича экстремал туризм хизматлари;
Канатли парк (тайпарк) экстремал туризм мажмуаси — ер сатҳидан маълум масофа баландликда арқонлар ёрдамида маҳкамланган аттрационлардан ташкил топган, турли даражадаги қийинчиликдаги вазифаларни бажариш учун мўлжалланган спорт ва сайёҳлик мажмуаси;
Тоғли ва чўл ҳудудларда зиплайн ҳамда канатли парк (тайпарк) экстремал туризм мажмуасини ташкил қилган тадбиркорлик субектларига ажратиладиган субсидия Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Туризм қўмитасининг Туризмни қўллаб-қувватлаш жамғармаси маблағлари ҳисобидан молиялаштирилади.
Субсидия зиплайн ва канатли парк (тайпарк) экстремал туризм мажмуалари тўлиқ фойдаланишга топширилгандан кейин ажратилади. Субсидия олиш учун тақдим этилган маълумотлар ва ҳужжатларнинг ҳаққонийлигига тадбиркорлик субекти масъул ҳисобланади.

Вазирлар Маҳкамаси қарорида белгиланишича, қуйидаги туман ва шаҳарлар тоғли ва чўл ҳудудларидазиплайн хизматлари ва канатли парк (тайпарк) экстремал туризм мажмуаси ташкил қилиниши режалаштирилган:
  Қорақалпоғистон Республикаси — Амударё, Мўйноқ, Тахтакўпир, Элликқалъа туманлари;
  Андижон вилояти — Хўжаобод тумани, Хонобод шаҳри;
  Бухоро вилояти — Когон, Ғиждувон, Ромитан туманлари;
  Жиззах вилояти — Арнасой, Бахмал, Зомин, Фориш туманлари;
  Қашқадарё вилояти — Китоб, Шаҳрисабз туманлари;
  Навоий вилояти — Конимех, Нурота, Хатирчи туманлари;
  Наманган вилояти — Косонсой, Поп, Чортоқ, Чуст туманлари;
  Самарқанд вилояти — Самарқанд, Ургут туманлари;
  Сурхондарё вилояти — Бойсун, Сариосиё туманлари;
  Сирдарё вилояти — Сайхунобод тумани;
  Тошкент вилояти — Ангрен шаҳри, Бўстонлик, Оҳангарон, Паркент туманлари;
  Фарғона вилояти — Сўх, Фарғона туманлари;
  Хоразм вилояти — Боғот, Тупроққалъа, Хива, Урганч, Янгибозор туманлари.