Хоразм ИИБда коррупцияга қарши курашиш масаласи муҳокама қилинди

Жорий йилнинг 11 июль куни Хоразм вилояти Ички ишлар бошқармаси бошлиғи ҳузурида навбатдаги тезкор йиғилиш бўлиб ўтди. Йиғилишда бошқарма бошлиғининг ўринбосарлари, соҳавий хизматлар раҳбарлари ва бошқарма шахсий таркиби тўлиқ иштирок этди. Шунингдек, Йўл ҳаракати хавфсизлиги бошқармаси (ЙҲХБ), Жамоат тартибини сақлаш бошқармаси (ЖТСБ) ҳамда ҳудудий ички ишлар органларининг барча ходимлари видеоконференц алоқа орқали йиғилишга уланишди.

Йиғилиш кун тартибидаги асосий масала — ички ишлар органларида хизмат интизомига қатъий риоя қилиш ва қонун устуворлигини таъминлаш, шунингдек, коррупция ҳолатларига йўл қўймаслик масаласи бўлди.

Вилоят ИИБ бошлиғи йиғилишда Президент томонидан жорий йилнинг 5 март куни ўтказилган Коррупцияга қарши курашиш миллий кенгаши йиғилишида белгилаб берилган устувор вазифаларнинг Хоразм вилоятида ҳам сўзсиз ижро этилиши зарурлигини алоҳида таъкидлади. Шу мақсадда ички ишлар органларида соҳага хос барча жараёнларда коррупциядан холи муҳитни таъминлаш бўйича манзилли ва мақсадли ишлар амалга оширилаётгани маълум қилинди.


Ёш кадрларга «устоз-шогирд» тизими

Ёш ходимларнинг хизматдаги савияси ва масъулиятини ошириш мақсадида «устоз-шогирд» анъанасини ривожлантириш масаласи ҳам йиғилишда кўтарилди. Малака ва тажрибага эга ходимлар ёш кадрларга бириктирилиб, уларнинг хизмат фаолиятида маслаҳатчи ва кўмакчи сифатида ҳаракат қилиши юзасидан кўрсатмалар берилди.

Коррупция ҳолатлари таҳлили

Йиғилишда ИИВ Шахсий хавфсизлик бош бошқармасининг Хоразм вилояти бўйича ҳудудий бўлими масъул ходими сўнгги кунларда республика бўйлаб қайд этилган турли коррупциявий жиноятлар, уларнинг келиб чиқишига сабаб бўлаётган омиллар ҳамда оқибатлари ҳақида батафсил маълумот берди.

Шу орқали ички ишлар органларида хизмат интизомини янада мустаҳкамлаш ва фуқаролар ишончини ошириш йўналишида тизимли чора-тадбирлар тақдим этилди.

Йиғилиш якунида муҳокама этилган масалалар бўйича тегишли қарорлар қабул қилинди ҳамда масъулларга аниқ вазифалар юклатилди.