Хоразмдаги боғчаларда қонун бор, адолат ва мантиқ-чи?

Мақтабгача таълим муассасаларида болалар учун озиқ-овқат меъёри Ўзбекистон Республикаси Вазирлар Маҳкамаси қарори ва тегишли вазирликлар буйруқлари билан тасдиқланган. Унга кўра, ҳар бир болага кундалик равишда 100 грамм нон ажратилиши белгиланган. Бир қарашда бу қонуний ва меъёрий ҳолдек кўринади. Аммо унинг ортида катта мантиқий саволлар ётибди.

Чунки ушбу меъёр 3 ёшдан 7 ёшгача бўлган барча болалар учун бир хил қилиб белгиланган. Савол туғилади:
 • Уч ёшли бола билан етти ёшли боланинг қорни ва озиқланиш эҳтиёжи бир хилми?
 • Нега озиқланишда боланинг ёши, вазни, физиологик ривожланиш босқичи ҳисобга олинмаяпти?
 • Қонун қўйилди, лекин унинг ортида мантиқ ва адолат борми?

Масалан, бирон оиланинг уйида ҳам кичик ва катта фарзандлар бор. Ота-она уларга овқатни ёшига ва истеъмолига қараб бериши табиий ҳол. Аммо давлат боғчасида нон меъёри ҳар кимга бир хил — кичикка ҳам, каттага ҳам. Бу ҳолат ҳаётий мантиққа мутлақо тўғри келмайди.

Кўпчилик ота-оналар ҳақли равишда савол бермоқда:
 • “Бу тартибни белгилаган вазирлик масъуллари уйларида ҳам шундай қилишадими?”
 • “Уч ёшли чақалоқ билан етти ёшли мактабгача болани бир хил грамм билан озиқлантириш қайси илмий асосга тўғри келади?”

Шуниси ачинарлики, бугунча масала “нон меъёри”дан бошланди. Агар бундай “бир хил” ёндашув давом этса, эртага бошқа овқатлар — гўшт, сут, витамин ва калория ҳисобида ҳам мантиқсизлик юзага чиқиши мумкин.

Қонун бор, аммо мантиқ ва адолат ҳам бўлиши шарт!
Мақтабгача таълим вазирлиги бундай қарорни қабул қилишдан олдин илмий-амалий асосларга таяниш, болаларнинг ёш гуруҳлари бўйича озиқланиш меъёрларини қайта кўриб чиқиши зарур.

Акс ҳолда, бу тизим фақат қоғозда қонуний, ҳаётда эса кулгили ва мантиқсиз ҳолат бўлиб қолаверади.

⸻

❓Хурматли мутасаддилар! Саволимиз очиқ: “Нон” меъёри қайси асосда белгилаган?