Боғотда пиёдалар йўли йўқолган: “Қулонқарабоғ” аҳолиси ҳаёти хавф остида — бу ҳолат учун ким жавоб беради?

Хоразм вилояти Боғот туманидаги Қулонқарабоғ қишлоғи аҳолиси бир неча ойдан буён бир муаммога дуч келмоқда — пиёдалар учун махсус йўлак, яъни тротуар умуман йўқ. Бу ҳолат нафақат аҳолининг кундалик ҳаётини қийинлаштирмоқда, балки уларнинг хавфсизлигига ҳам жиддий таҳдид солмоқда.

Йўлда фақат ҳайдовчилар учун қулайлик яратилган, аммо пиёдалар учун йўл четида юриш ҳаёт-мамот масаласига айланиб қолган.

 “Пиёдалар одам эмасми?” — адолат талаб қилган сўров

Аҳоли фикрича, ҳозирги йўл ҳолатида болалар мактабга, кексалар бозорга, аёллар иш ёки шифокор қабулларига бориш учун мажбур равишда автомашиналар қатнови ичида юришга мажбур бўлмоқда.

Бу эса ҳар куни юз бериши мумкин бўлган бахтсиз ҳодисалар хавфини оширмоқда.

“Ҳар куни йўлдан ўтиш — жон билан курашдек. Машиналар тез юради, пиёдалар учун жой йўқ. Нима учун ҳайдовчилар учун шароит бору, пиёдалар одам эмасми?”
— дейди маҳаллий фуқаролардан бири.

Пиёдалар йўлаги ўрнига — тошзор!

Қишлоқ аҳолиси айтишича, айрим жойларда пиёдалар юрадиган қисмга майда ва катта тошлар ташлаб чиқилган.
Бу нафақат йўлни ноқулай, балки хавфли қилиб қўйган.

Кекса ёшдаги фуқаролар, болалар ва ногиронлиги бўлган шахслар учун бу тошлар орқали юриш амримаҳол. Айрим жойларда тошлар баланд бўлиб, одамлар йўл четидан чиқолмай, машиналар қатновига кириб кетмоқда.

“Йўл четида тротуар дегани йўқ, бор бўлса ҳам майда ва катта тошлар билан тўлган. Ҳар қадамда йиқилиш ёки машинанинг олдига чиқиб қолиш хавфи бор”,
— дейди қишлоқ аёли.

“Йўл қуриш” фақат ҳайдовчилар учунми?

Сўнгги йилларда Боғот туманида кўплаб йўллар янгиланди, лекин пиёдалар хавфсизлиги масаласи эътибордан четда қолмоқда. Йўллар асфальтланган, аммо тротуар йўқ, чуқурлар тўлдирилмаган, тошлар йиғилмаган.

Бу ҳолатда “йўл қурдик” деган сўз фақат транспорт учунгина тўғри келади. Инсон учун йўл қуриш — ҳақиқий қурилишнинг мезонидир.
 Масъуллар қаерда?

Бу ҳолат учун жавобгарлик туман ҳокимлиги, автомобиль йўллари бўлими, ва ЙҲХБ (Йўл ҳаракати хавфсизлиги бўлими) зиммасида. Аммо ҳозирча улардан бирортаси бу ҳолат бўйича очиқ муносабат билдиргани йўқ.

“Бу муаммо ҳақида бир неча марта айтдик, маҳалла орқали ҳам мурожаат қилдик. Лекин натижа йўқ. Ҳар гал ваъда берилади, аммо тошлар ҳамон жойида, пиёдалар йўли ҳам йўқ,”
— дейди маҳаллий фуқаро.

Масъулият ва виждон

Хоразмда йўл қурилишига миллиардлаб сўмлар сарфланмоқда, лекин натижа одамлар ҳаётига таъсир қилмаётган бўлса — бу маблағ эмас, виждон масаласидир.

Пиёдалар учун йўл қуриш фақат қурилиш эмас — инсон ҳаётини асрашдир.
“Қулонқарабоғ” аҳолисига ҳам шундай ҳақ бор. Улар йўлда эмас, хавфсиз тротуарда юришни хоҳлайди.
“XorazmBugun” фикри:

Хоразмда йўллар қурилаётган бўлса ҳам, пиёдалар йўли қурилмаяпти.
Бу — эътиборсизликнинг эмас, беҳурматликнинг натижаси.
Ҳокимлик ва масъул идоралар бу ҳолатга зудлик билан муносабат билдириши ва амалий чора кўриши лозим.

Чунки пиёдалар ҳам одам.
Пиёдалар ҳам Хоразм аҳолиси.
Пиёдалар ҳам ҳаёт ҳақида гапиришга ҳақли.