Хивадаги “Ош фестивали”: 9 тонна палов ким учун тайёрланди?

Кеча Хоразм вилоятининг Хива шаҳрида навбатдаги “Ош фестивали” бўлиб ўтди. Тадбир олдиндан катта тарғиб қилинди, оммага эълон қилинди, аммо энг қизиғи — тайёрланган улкан паловга оддий халқ яқинлашишнинг ўзи қийин бўлди. Шу боис кўпчиликда табиий савол туғилди: бу палов аслида ким учун тайёрланди?

9 тонна палов — халқ маблағи қаерга кетди?
Фестиваль ҳақидаги хабарлар тарқалган пайтдаёқ айрим фуқаролар томонидан танқидий фикрлар билдирилган эди. 9 тонна палов тайёрлаш учун сарфланган маблағ, ресурс ва меҳнатни ҳисобга олсак, кўпчиликда бир савол пайдо бўлади: шу маблағни бошқа долзарб муаммоларга йўналтирса бўлмасмиди?

Йўллар, ичимлик суви, таълим, тиббиёт, ёки аҳоли учун зарур инфратузилмалар — буларнинг барчаси ҳали ҳам ечим кутаётган масалалар. Фестиваль эса, афсуски, бу муаммоларни бир кунга бўлса ҳам четга суриб қўйди.

Олaмон йиғилди, аммо паловга яқинлашиш мушкул бўлди

Тадбирга катта одамлар оқими кузатилди. Ижтимоий тармоқларда тарқалган видеоларда одамларнинг ичкарига кира олмаётгани, тўсиқлар ортида қолиб кетгани яққол кўринади. Кўпчиликнинг фикрига кўра, бу ҳолат ҳар йили такрорланади: фестиваль бор, аммо ундан халқнинг фойдаси кам.

Одамлар “уйида палов емагандек” йиғилгани ҳақидаги ҳазиломуз фикрлар ҳам тарқалди, аммо бу ҳазил остида жиддий норозилик ётади.

Фестиваль туризмни ривожлантирадими?
Тадбир ташкилотчилари бундай фестиваллар туризмни ривожлантиришини таъкидлайди. Лекин савол туғилади: овқат ейиш учун бошқа мамлакатдан турист келадими?

Албатта, миллий таомлар — маданиятимизнинг бир қисми. Лекин туризм фақат овқат билан эмас, балки инфратузилма, сервис, қулайлик ва маданий дастурлар билан ривожланади. Бир неча соатлик палов тарқатиш орқали катта иқтисодий фойда кутиш — реал натижа эмас.

Икки соатлик қўрин тўйиши нима беради?
Фестивалнинг энг асосий саволи шунда: бу икки соатлик қўрин тўйиши халқ ҳаётини яхшилайдими?

Афсуски, жавоб кўпчилик учун аниқ: йўқ. Фақат бир кунлик шов-шув, бир неча видеоролик ва ижтимоий тармоқлардаги муҳокамалар. Халқ эса яна ўз муаммолари билан ёлғиз қолади.

Хивадаги “Ош фестивали” яна бир бор кўрсатдики, оммавий тадбирлар ташкил этишда энг муҳим нарса — халқ манфаати ва шаффофлик. 9 тонна палов тайёрлаш орқали эмас, балки аҳолининг кундалик муаммоларига ечим топиш орқали ҳақиқий ривожланишга эришилади.

Фестиваль ўтди, одамлар тарқалди, видеолар эса тармоқларда қолди. Лекин савол ҳамон очиқ: бу палов ким учун тайёрланди?