Хоразмда маст ҳолда автомобиль ҳайдаб, пиёда ўлимига сабаб бўлган ИИБ ходими 3 йил 1 ойга қамалди

Хоразм вилоятида ички ишлар органи ходими маст ҳолда автомобиль бошқариб, 29 ёшли пиёда аёлни уриб юборгани учун судланди. Йўл-транспорт ҳодисаси 2025 йил 27 сентябрь куни Урганч—Шовот йўлида содир бўлган. Суд ҳукми жорий йил 23 февраль куни эълон қилинган. “Дарё” суд ҳужжати билан танишиб, воқеа тафсилотларини ўрганди.

Айбланувчи нима деган?

Ҳужжатда ҳайдовчи судда воқеани қандай айтиб бергани баён қилинган. ЙТҲ тунги соат 22:00 атрофида юз берган. Авариядан олдин вилоят ИИБда катта инспектор бўлиб ишлаган Умарбек Атамуратов курсдоши билан чойхонада спиртли ичимлик ичганини айтган. Кейин Tracker-2 автомобилида Шовотдан Урганчга йўлга чиққан. Ҳайдовчи кечаси автомобиль олд чироқларини ёқмасдан ҳаракатланган.
Йўлда кетар экан, машинанинг ўнг томонида қаттиқ зарба овозини эшитган ва тўхтаган. 

Автомобилдан тушгач, бир аёл ариқ ичида ётганини кўрган ва одам уриб юборганини тушунган.
Судда берган кўрсатмасига кўра, ўша пайтда ортидан Gentra автомобилида келиб, тўхтаган йигитлар билан бирга аёлни ариқдан чиқарган.

“Кейин йигитларга ИИБ ходими эканим, аёлни тезда касалхонага олиб боришлари кераклигини айтдим. Ўзим уйга бориб, пул олиб келишимни тушунтирдим. Аёлни оғир аҳволда ташлаб кетмадим, аксинча шифокорлар унинг ҳаётини сақлаб қолиши ва яхши қарашлари учун уйдан пул олиб келишга уриндим”, деган у судда.
Айбланувчи ўша пайт ўзини ёмон ҳис қилгани, бироқ спиртли ичимлик истеъмол қилгани билан “ҳушёр” бўлганини айтган. Уйга пул олиш учун шошиб кетаётганда светофорда қизил чироқ ёниб қолгани сабаб олдидаги Cobalt бирданига тўхтаганини, унинг ортидан бориб урилганини ҳам таъкидлаган. 

Аёл аварияда оғир тан жароҳати олгани сабаб Шовот тумани тиббиёт бирлашмасида вафот этган. Айбдор судда қилмишидан пушаймонлигини айтиб, кечирим ва суддан енгиллик сўраган.