Урганч–Шовот йўлида хавф: юк машиналаридан тўкилаётган тошлар кимни ўйлантиради?

Хоразм вилоятидаги Урганч–Шовот автомобиль йўлида ҳаракатланаётган юк ташувчи автомобиллар билан боғлиқ муаммо кундан-кунга жиддий тус олмоқда. Оғир юк ортилган айрим юк машиналари белгиланган қоидаларга амал қилмасдан ҳаракатланаётгани оқибатида йўлга шағал ва тошлар тўкилиб, бошқа транспорт воситаларига зарар етказмоқда.

Гувоҳларнинг айтишича, айниқса қурилиш материаллари ташиётган юк машиналари усти ёпилмаган ҳолда ёки ортиқча юк билан йўлга чиқмоқда. Натижада ҳаракат вақтида юкларнинг бир қисми йўлга тушиб қолмоқда. Бу эса ортдан келаётган автомобиллар учун жиддий хавф туғдириб, ойна синши, кузовлар шикастланиши каби ҳолатларни келтириб чиқармоқда.

Ҳайдовчилар бу муаммодан норози. Уларнинг таъкидлашича, йўлда тўкилган тошлар нафақат автомобилларга зарар етказмоқда, балки йўл-транспорт ҳодисалари хавфини ҳам оширмоқда. Айрим ҳолатларда ҳайдовчилар тўсатдан пайдо бўлган тошлардан қочишга уриниб, бошқарувни йўқотишлари мумкин.

Афсуски, ушбу вазиятга масъул ташкилотлар томонидан етарли даражада эътибор қаратилмаётгани айтилмоқда. Йўл ҳаракати хавфсизлигини таъминлаш ҳамда юк ташиш қоидаларига риоя этилишини назорат қилувчи идоралар томонидан мунтазам рейдлар ўтказилмаётгани, қоидабузарларга нисбатан кескин чоралар кўрилмаётгани муаммонинг илдизини янада чуқурлаштирмоқда.

Мутахассислар таъкидлашича, юк ташишда хавфсизлик талабларига амал қилиш — бу нафақат қонуний мажбурият, балки инсон ҳаёти ва мол-мулкини ҳимоя қилишнинг муҳим омилидир. Юк машиналари ортилган маҳсулотлар махсус қопламалар билан ёпилиши, ортиқча юкланишга йўл қўйилмаслиги ва техник талаблар тўлиқ бажарилиши шарт.

Мазкур муаммо бўйича масъул идоралар зудлик билан чора кўриши, назоратни кучайтириши ва қоидабузарларга нисбатан қатъий жавобгарлик чораларини қўллаши зарур. Акс ҳолда, оддий фуқаролар зарар кўришда давом этади.

Йўл — барчаники. Ундаги хавфсизлик ҳам умумий масъулиятдир.