Туркиянинг “Кожаэлиспор” клуби ярим ҳимоячиси Ҳабиб Али Кейта бир қизга ошиқ бўлиб қолгани сабабли жамоани рухсатсиз тарк этган. Бу ҳақда клуб президенти Режеп Дурул маълум қилди.

24 ёшли малилик футболчи ўтган мавсумда “Кожаэлиспор” сафида ижара асосида ўйнаган, шу йил июль ойида эса Франциянинг “Клермон” клубидан доимий трансфер асосида жамоага қўшилган. У ўтган мавсумда клуб сафида 33 та учрашувда майдонга тушиб, битта гол урган.

“Албатта, Кейтанинг жамоани рухсатсиз тарк этгани яхши эмас. Миш-мишларга кўра, у бир қизга ошиқ бўлиб қолган ва айнан шу сабабли жамоадан кетган. Бундан ташқари, у Туркияда эмас, чет элда фаолиятини давом эттиришни хоҳлаяпти. Унинг вакиллари эса баъзан қўнғироқларга жавоб беришади, баъзан эса йўқ. “Кожаэлиспор” зарур ҳуқуқий жараёнларни бошлайди, аммо ҳозирча биз унга вақт бердик. Айтишларича, унга уч-тўртта клубдан қизиқиш бор, аммо ҳозирча бизга бирорта ҳам расмий таклиф келиб тушмаган”, дейди Дурул.

Клуб раҳбари футболчи қайтган тақдирда ҳам унинг келажаги муҳокама қилиниши мумкинлигини таъкидлади.

“Агар Кейта қайтса, клуб учун қайси қарор маъқул эканини кўриб чиқамиз. Керак бўлса, уни кечирамиз ва жамоага қайтарамиз. Ҳозирча якуний қарор қабул қилингани йўқ, аммо интизомий чоралар албатта қўлланилади. Улар қандай бўлишини ҳали белгиламадик.

Агар футболчи қилган хатоси учун узр сўраса, адашганини тан олса, мен бу ҳақда ўтириб ўйлаб кўраман. Очиғини айтсам, уни жамоага қайтаришни истардим, чунки у фойдали ўйинчи”, дея қўшимча қилди клуб президенти.

Ҳабиб Али Кейтанинг ўзи эса бу ҳақда тарқалган хабарларни кескин рад этди.

“Туҳмат ҳеч қачон ҳеч кимни яхши кўрсатмайди. Аммо айримлар бундай хатти-ҳаракатларни жиддий эмас деб ҳисоблашади, чунки мен доимо жилмайиб юрадиган ва босиқ инсонман. Ҳақиқатни билиш ҳар доим ёлғон тарқатишдан кўра, кўпроқ вақт талаб қилади. Мен бундай бемаъни гапларнинг яна тарқалишига йўл қўя олмайман. Менинг меҳрибонлигимни заифлик деб қабул қилмасликлари керак”, дейди футболчи.

Маълумот учун, “Кожаэлиспор” ўтган мавсумда (2025–2026) Туркия Суперлигасида 11-ўринда якунлади. Эслатиб ўтиш жоиз, клуб 2024–2025 мавсумида TFF 1-лигасида чемпион бўлиб, 16 йиллик танаффусдан сўнг, Туркия элитасига қайтган эди.