Ўзбекистонда нефть-газ қазиш камайиб, электр токи ва бензин ишлаб чиқариш ўсди

Статистика қўмитаси Ўзбекистонда 2026 йил I чоракдаги саноат маҳсулотлари ишлаб чиқариш ҳажми бўйича ҳисобот эълон эълон қилди. Таҳлилда нефть-газ қазишда қисқариш, электр токи, автомобил ва бензин ишлаб чиқаришда ўсиш қайд этилган. 

Январь-март ойларида мамлакатдаги 61 минг корхона жами 289,3 трлн сўмлик саноат маҳсулотлари ишлаб чиқарган. Бу кўрсаткич 2025 йил мос даврига нисбатан 8 фоизга ошган. Энг юқори қийматдаги саноат товарлари Навоий вилояти (73,5 трлн сўм), энг паст қиймат эса Сурхондарё вилояти (3,8 трлн сўм) ҳиссасига тўғри келган.

Нефть, газ ва кўмир қазишда​ пасайиш кузатилди
Уч ой давомида республикада 9,6 млрд куб метр табиий газ қазиб олинган. Мазкур кўрсаткич 2025 йил I чорагига нисбатан 1,7 млрд куб метрга ёки 15 фоизга кам.

Дастлабки чоракда 157,3 минг тонна нефть қазилган бўлса, бир йил олдинги кўрсаткич 160,8 минг тонна бўлган.

Январь-март ойларида 1,1 млн тонна кўмир қазиб олинган. Мазкур кўрсаткич бир йил аввалгидан 100 минг тоннага пасайган.

Ток, бензин ва дизель кўрсаткичлари
Уч ой давомида мамлакатда 22,93 млрд киловатт соат электр энергияси ишлаб чиқарилган. Таққослаш учун, бир йил аввалги кўрсаткич 21,9 млрд киловатт соатни ташкил этганди.

Ҳисобот даврида 313,2 минг тонна автомобил бензини ишлаб чиқарилган. Бу кўрсаткич 2025 йил I чорагида 304,3 минг тонна бўлган.

Энг юқори ўсиш дизель ёқилғиси ишлаб чиқаришда кузатилган. Январь-мартда 280,9 минг тонна дизель ёқилғиси ишлаб чиқарилган. Таққослаш учун, 2025 йил мос давридаги кўрсаткич 182 минг тонна бўлган. Бунда йиллик ўсиш қарийб 55 фоизга етган.
Автомобил саноати ўсди
2026 йил I чоракда Ўзбекистонда 108 769 минг дона енгил автомобиллар ишлаб чиқарилган. Бу бир йил аввалги кўрсаткичдан 11 495 тага кўпайган. Энг кўп ишлаб чиқарилган автомобил доимгидек Cobalt бўлган — 38 397 дона. Кейинги ўринларни Damas (21 503 та), Tracker (10 746 та) ва Onix (8 950 та) эгаллаган. Кia уч ойда 7 105 дона, BYD 5 111 дона енгил автомобил ишлаб чиқарган. Мазкур автомобиллар қаторида фақатгина Damas ва Onix ишлаб чиқаришда қисқариш кузатилган. Қолган моделларда ўсиш қайд этилган.