Sindorov Gukeşdan ustun keldi: özbekistonlik şaxmatçi Polşadagi nufuzli turnirda iştirok etmoqda

Dunyoning eng kuçli grossmeysterlarini birlaştiruvçi nufuzli Grand Çess Tour musobaqasining 11-mavsumi boşlandi. Mavsum ananaga köra Polşa poytaxti Varşava şahri mezbonlik qiladigan rapid va blits turniri bilan start oldi.

Uşbu nufuzli musobaqada amaldagi Jahon çempioni, hindistonlik Gukeş Dommaraju hamda çempionlik uçun rasmiy davogar, özbekistonlik Javohir Sindorov ham iştirok etyapti. Turnir formatiga köra ikki şaxmatçi özaro 3 marta (1 ta rapid va 2 ta blits) öyin ötkazadi.

Musobaqaning törtinçi kunida şaxmatçilar blits yönalişida töqqizta turda öz imkoniyatlarini sinab kördi. Javohir Sindorov bir ğalaba, oltita durang va ikkita mağlubiyat qayd etgan holda oçkolari sonini 12 taga yetkazib oldi va turnir jadvalida 9-örinni egallab turibdi. Özbekistonlik grossmeyster yagona ğalabasini amaldagi Jahon çempioni Gukeş ustidan qölga kiritdi. Rapid bahslaridagi özaro öyinda esa hindistonlik grossmeyster ğalaba qozongan edi. Ertaga, 9 may kuni blits bosqiçida 9 ta tur ötkaziladi va har ikki şaxmatçi yana bir bor özaro töqnaş keladi.

Turnir reglamentiga köra, blits bahslarida har bir ğalaba uçun — 1, durangga esa 0,5 oçko beriladi. Töqqizinçi turdan söng amerikalik şaxmatçilar yetakçilik qilmoqda. Peşqadam Hans Nieman umumiy 16,5 oçko jamğargan. Şuningdek, Uesli So hisobida 16 oçko mavjud. Fabiano Karuana esa 15 oçko bilan qöşimça körsatkiçlarga köra 3-poğonada bormoqda. Turnirning amaldagi ğolibi Vladimir Fedoseyev ham 15 oçkoga ega, Gukeş Dommaraju 13 oçko bilan beşinçi, 12 oçkoga ega Sindorov esa 9-poğonadan joy olgan.

Rapid bahslarida esa har bir ğalaba uçun şaxmatçilar 2 oçkoga ega böldi, durang natija uçun esa 1 oçkodan berildi.
2026 yilgi Super rapid/blits turnirining töliq tarkibi:

• Javohir Sindorov (Özbekiston)
• Gukeş Dommaraju (Hindiston)
• Alireza Firuzja (Frantsiya)
• Xans Nieman (AQŞ)
• Fabiano Karuana (AQŞ)
• Vladimir Fedoseyev (Sloveniya)
• Maksim Vaşe-Lagrav (Frantsiya)
• Yan-Kşiştof Duda (Polşa)
• Radoslav Voytaşek (Polşa)
• Uesli So (AQŞ)

3 maydan 10 mayga qadar bölib ötadigan uşbu musobaqa jami 200 000 AQŞ dollari miqdoridagi mukofot jamğarmasiga ega. Turnir doirasida şaxmat muxlislari 7 kun davomida 135 ta şiddatli öyin guvohi bölişadi:

• Rapid: 9 ta turdan iborat bahslar
• Blits: 18 ta turdan iborat ikki davrali marafon

Musobaqada Grand Çess Tour’ing 5 nafar doimiy iştirokçisi hamda 5 nafar maxsus taklif etilgan (wildcard) grossmeysterlar dona suradi. Sindorov uşbu turnirga aynan wildcard orqali taklif etilgan.