Солиқ қўмитаси P2P тўловлар назоратини бошлади
 
Солиқ қўмитаси савдо фаолияти билан шуғулланувчи айрим хўжалик юритувчи субъектларда савдо амалиётлари пластик картадан пластик картага пул ўтказмалари орқали амалга оширилаётган ҳолатлар таҳлил қилинаётганини маълум қилди.
 
Ижтимоий тармоқларда солиқ инспекторлари фуқароларнинг банк карталарини оммавий текширишга киришгани, тез-тез пул ўтказмалари сабаб айрим шахслар сўроққа чақирилаётгани ҳамда ҳар бир тушум учун тушунтириш хати талаб қилинаётгани ҳақида хабарлар тарқалган эди. Шу муносабат билан Солиқ қўмитаси расмий изоҳ берди.
Қўмита маълумотига кўра, айрим ҳолатларда P2P операциялари орқали келиб тушган даромадлар солиқ ҳисоботларида акс эттирилмаяпти. Оқибатда давлат бюджетига тушиши лозим бўлган маблағлар тўлиқ шаклланмай қолмоқда.

Шу боис, солиқ органлари томонидан юридик шахсларда фаолият юритувчи раҳбар ходимларнинг банк пластик карталарига келиб тушган маблағлар юзасидан таҳлилий ўрганишлар олиб борилмоқда.

Аниқланган ҳолатлар асосида солиқ ҳисоботларида кўрсатилмаган даромадлар бўйича тегишли чоралар кўрилмоқда ҳамда солиқ тўловчиларга хабарномалар юборилмоқда.

Қўмита таъкидлашича, мазкур жараён жазолаш ёки босим ўтказишга эмас, балки иқтисодий адолатни таъминлаш, яширин айланмаларни қисқартириш ва қонун доирасида фаолият юритаётган ҳалол тадбиркорларни қўллаб-қувватлашга қаратилган.
“Ҳар бир тўланган солиқ мамлакат тараққиёти, янги йўллар, мактаблар, шифохоналар ва халқ фаровонлиги учун қўшилган ҳиссадир”, - дейилади муносабатда.

Шунингдек, Солиқ қўмитаси барча тадбиркорлик субъектларини амалдаги қонунчиликка қатъий риоя қилишга, савдо тушумларини тўлиқ расмийлаштиришга ва солиқ ҳисоботларида ҳаққоний акс эттиришга чақирган.
 
Маълумот учун, Ўзбекистонда 2026 йил 9 августдан тижорат банклари учун ички назорат қоидаларига киритилган янги ўзгартишлар кучга киради. Унда гумонли ва шубҳали операцияларни аниқлашнинг янги мезонлари белгиланган. Жумладан, 16 ёшга тўлмаган шахслар ҳисобварағига 16,5 миллион сўмдан ортиқ маблағ келиб тушиши ёки ечиб олиниши гумонли операция сифатида баҳоланиши мумкин.

Бундан ташқари, банклар ва нобанк молия ташкилотларига нисбатан санкциялар қўллаш тартиби ҳам 2026 йил 7 августдан янгиланади. Янги тартибга кўра, молиявий ташкилотларга нисбатан қўлланадиган чоралар ва жарималар рўйхати кенгайтирилади.