Украина ЕИнинг 20-санкция пакетига қўшилди, рўйхатда Ўзбекистон ҳам бор

Украина президенти Владимир Зеленский икки фармонни имзолаб, мамлакатнинг Миллий хавфсизлик ва мудофаа кенгаши томонидан қабул қилинган қарорни кучга киритди. Унга кўра, Украина Европа Иттифоқининг Россияга қарши жорий этган 20-санкция пакетига расман қўшилди.

Расмий маълумотларга кўра, санкциялар жами 120 нафар шахс ва ташкилотни қамраб олган бўлиб, улар асосан Россия иқтисодиётининг стратегик тармоқлари ва ҳарбий-саноат мажмуаси билан боғлиқ субъектлар ҳисобланади.

Санкциялар Ўзбекистон ва Марказий Осиё компанияларига ҳам тааллуқли. 

Янги чекловлар доирасида Россия, Беларусь, БАА, Қирғизистон, Қозоғистон ва Ўзбекистон билан боғлиқ бир қатор шахслар ҳамда компаниялар ҳам санкциялар рўйхатига киритилган.

Маълум қилинишича, рўйхатга жами 16 нафар фуқаро ва 31 та компания киритилган бўлиб, улар орасида Россиянинг вақтинча босиб олган ҳудудларида фаолият юритаётган субъектлар ҳам мавжуд.

Шунингдек, Эроннинг 19 нафар фуқароси ва 11 та компанияси ҳам санкциялар остига тушган.

Янги пакетдан Россиянинг ҳарбий-саноат мажмуаси, радиоэлектрон кураш тизимлари, дронлар учун дастурий таъминот ва эҳтиёт қисмлар ишлаб чиқарувчилари, шунингдек нефть, газ ва олтин қазиб олиш соҳалари ўрин олган.

Санкциялар қўлланган компаниялар қаторида дрон ва аэрокосмик маҳсулотлар ишлаб чиқарувчи “Атлант Аэро”, шунингдек алоқа тизимлари ҳамда учувчисиз қурилмалар учун компонентлар тайёрловчи “ИРЗ-Связ” корхоналари ҳам бор.

Бундан ташқари, БААда рўйхатдан ўтган айрим компанияларга нисбатан ҳам чекловлар жорий этилган. Улар асосан саноат ускуналари, лаборатория жиҳозлари, кимёвий маҳсулотлар ва фуқаролик авиацияси учун эҳтиёт қисмлар етказиб бериш билан шуғулланган.

Эроннинг дрон ва ракета дастурлари ҳам санкциялар остида қолган. Рўйхатга Эроннинг баллистик ракета ва дронлар ишлаб чиқариш дастурлари билан боғлиқ 19 нафар шахс ва 11 та компания ҳам киритилган.

Шу билан бирга, россиялик прокурор Людмила Баландина, судья Дмитрий Гордеев ва тарғиботчи Мария Ситтелга нисбатан ҳам санкциялар қўлланди. Украина томони уларни украиналикларга қарши репрессиялар ва дезинформация тарқатишда айбламоқда.

Украина президентининг санкциялар сиёсати бўйича вакили Владислав Власюкнинг маълум қилишича, Киев Европа Иттифоқи ва бошқа ҳамкор давлатлар билан санкцияларни мувофиқлаштириш сиёсатини давом эттирмоқда.

Унинг сўзларига кўра, Россия ва уни қўллаб-қувватлаётган субъектларга нисбатан босимни кучайтириш мақсадида, ЕИнинг 21-санкция пакети устида ҳам иш олиб борилмоқда.