Ўзбекистон клублари Жаҳон чемпионатидаги футболчилари учун қанча ишлаб олади?

Ўзбекистон миллий терма жамоасининг жаҳон чемпионатида қатнашадиган 26 нафар футболчидан иборат  якуний таркиби маълум. Таркибдан 11 нафар легионер ва 15 нафар Ўзбекистон чемпионати вакиллари жой олди. Ана шу 15 нафар футболчи Ўзбекистоннинг 8 та клубидан миллий терма жамоага чақирилди.

Маълумки, FIFA "Cлуб Бенефиц Программе" (Клубларга фойда келтириш дастури) қоидаларига кўра, футболчиси мундиалда қатнашадиган клубларга ҳар бир кун учун 11 минг АҚШ доллари миқдорида пул беради. Тўловлар нафақат гуруҳ босқичидаги ўйин кунлари, балки турнир бошланишидан 10 кун олдинги тайёргарлик даврини ҳам ўз ичига олади. Гуруҳ босқичи якунлангунга қадар (11 июндан 27 июнгача) жамоалар жами 27 кун давомида турнирда (ва унга тайёргарликда) расман қатнашган ҳисобланади.
Демак, терма жамоага чақирилган ҳар бир футболчи ўз клуб(лар)ига гуруҳ босқичининг ўзи учун тўғридан-тўғри 297,000 ($11,000 x 27) ишлаб беради.
Ўзбекистон клублари мундиалда қатнашадиган футболчилари учун гуруҳ босқичининг ўзида қуйидагича маблағ ишлаб олишади:

Клублар	Футболчилар сони	Кафолатланган даромад ($)	Футболчилар рўйхати
"Пахтакор"(Тошкент)	5 нафар	1,485,000	Ҳ. Алижонов,   Ш.Насруллаев,   А.Мозговой,   Д.Ҳамдамов,Зайд Таҳсин (Ироқ)
"Нефтчи" (Фарғона)	3 нафар	891,000	Б.Эргашев, Ф.Сайфиев, Ж.Искандеров
"Насаф" (Қарши)	2 нафар	594,000	А.Неъматов,  У.Эшмуродов
"Динамо" (Самарқанд)	2 нафар	594,000	Ж. Ўрозов, А. Амонов
"Навбаҳор"(Наманган)	1 нафар	297,000	Ў.Юсупов
ОКМК(Олмалиқ)	1 нафар	297,000	А.Ўлмасалиев
"Сурхон" (Термиз)	1 нафар	297,000	Б.Каримов
"Бухоро" (Бухоро)	1 нафар	297,000	Ш.Эсанов

Эътиборли томони, Ўзбекистон клубларида тўп сураётган легионерлар ичида фақат бир нафари — "Пахтакор"нинг ироқлик футболчиси Зайд Таҳсин терма жамоасидан чақирув олган.

Юқоридаги жадвалдаги маблағ якуний миқдор эмас. Бир муҳим жиҳатга эътибор қаратиш керак: Бу пуллар якунда тўлиқлигича футболчининг ҳозирги клубига ўтиб кетмайди. FIFA қоидасига кўра, жами сумма футболчининг охирги 2 йил давомида ўйнаган клублари ўртасида (ўтказган вақтига мутаносиб равишда) фоиз ҳисобида бўлиб берилади.

Айтайлик, футболчи 2024-йилдан 2026-йилги қишки трансфер ойнасигача "А" клубида ўйнаган, кейин эса "Б" клубига ўтган. Бу ҳолда, Жаҳон чемпионатида иштирок этиш учун компенсация қуйидагича тақсимланади: 75 фоиз янги "Б" клубига, қолган 25 фоизи эса собиқ "А" клубига ўтади.