Бухоро вилоятининг Вобкент туманида маст эркак қўлига пичоқ олиб, ўзини ўлдириш билан таҳдид қилди. Профилактика инспектори эса уни зарарсизлантириб, суиқасднинг олдини олди. Бу ҳақда Ички ишлар вазирлиги хабар берди.

Қайд этилишича, жорий йилнинг 22 июль куни тонгда 112 қисқа рақамига Вобкент туманидаги хонадонлардан бирида оилавий можаро юз бергани ҳақида мурожаат келиб тушган. Маълум бўлишича, эр-хотин ўртасидаги жанжал оқибатида аёл уйидан чиқариб юборилган, унинг икки нафар вояга етмаган фарзанди эса кучли маст ҳолатда бўлган отаси билан ичкарида қолиб кетган.

Хабар ортидан ҳудуд профилактика инспектори воқеа жойига етиб борган. Хонадон дарвозаси ичкаридан қулфлангани сабаб у баланд девордан ошиб тушиб, ҳовлига кирган. У тўғридан тўғри болалар томон югурган ва уларни хавфсиз жойга олиб ўтган.

Шундан сўнг, инспектор эркакни тинчлантиришга уринган. Бироқ эркак қўлига ошхона пичоғини олиб, уни томоғига тираган ҳолда ўз жонига қасд қилиш билан таҳдид қилган. У инспектордан уйни тарк этишини ва у билан бўлимга бормаслигини айтган.

Вазиятнинг кескинлашганига қарамай, профилактика инспектори эркак билан мулоқотни давом эттириб, психологик усуллар орқали уни чалғитишга эришган. Қулай фурсатдан фойдаланиб, унинг қўлидаги пичоқни тортиб олган ва фуқарони зарарсизлантирган.

“Сарасув маҳалласида хизмат олиб бораётганимизда Бадой қишлоғидаги хонадонда оилавий можаро юз бергани ҳақида хабар олдик. Фуқаро эшикни очмагани учун девордан ошиб, ҳовлига кирдик ва болаларни хавфсиз жойга олиб чиқдик. Шу пайтда маст ҳолатдаги фуқаро қўлига ошхона пичоғини олиб, ўз жонига қасд қилиш билан таҳдид қилди ҳамда биздан чиқиб кетишимизни талаб қилди. Уни психологик жиҳатдан чалғитиб, қулай фурсатдан фойдаланиб қўлидаги пичоқни олиб қўйишга муваффақ бўлдик”, деган профилактика инспектори.

Ички ишлар вазирлиги маълумотига кўра, профилактика инспекторининг тезкор ва қатъий ҳаракати натижасида икки нафар боланинг ҳаёти сақлаб қолинган ҳамда эҳтимолий фожианинг олди олинган.

Эслатиб ўтамиз, аввалроқ Тошкент шаҳри Хотира хиёбони ёнидаги “Бўзсув” каналига ўзини ташлаган аёлни қутқаришга уринган Миллий гвардия ходими ҳалок бўлган эди.