Хоразмда таълим сифати паст бўлган 9 та мактаблар рўйхати тасдиқланди 

Мактабгача ва мактаб таълими вазирлигининг тегишли буйруғи билан Ўзбекистонда таълим сифати паст бўлган мактаблар рўйхати тасдиқланди.

2025/26-ўқув йили учун таълим даражаси юқори бўлмаган мактаблар рўйхатига 460 та мактаб киритилди. Бундай мактабларнинг энг кўпи — 99 таси Қашқадарё вилоятида жойлашган.

Қолган ҳудудларда таълим даражаси юқори бўлмаган мактаблар сони қуйидагича:

  Самарқанд вилоятида — 86 та;
  Сурхондарё вилоятида — 70 та;
  Жиззах вилоятида — 36 та;
  Наманган вилоятида — 34 та;
  Сирдарё вилоятида — 32 та;
  Фарғона вилоятида — 29 та;
  Қорақалпоғистонда — 24 та;
  Андижон вилоятида — 23 та;
  Навоий вилоятида — 16 та;
  Хоразм вилоятида — 9 та;
  Бухоро вилоятида — 5 та.

“Халқ таълими инфо” портали маълумотларида келтирилишича, 2023-йилда шундай мактаблар рўйхатда 642 та, 2024-йилда 545 та эди. Бу йил таълим сифати паст бўлган мактаблар сони 75 тага қисқарган.
Таълим сифати паст бўлган мактабларга бошқа ҳудудлардан жалб этилган ўқитувчиларга устама тўланади

Вазирлар Маҳкамасининг 2021-йилдаги қарори билан тасдиқланган низомга кўра, олий маълумотга ва биринчи ёки олий малака тоифали, камида 1 йил педагогик иш стажига эга ўқитувчилар таълим сифати паст бўлган мактабларга бошқа ҳудудлардан жалб этилган тақдирда уларга 50 фоиздан 100 фоизгача устама тўланади.

Бунда бошқа ҳудудлардан жалб этилган ўқитувчиларга қуйидагича миқдорда қўшимча ҳақ тўланади:
  бир вилоят доирасида бошқа туман ва шаҳарлардан келиб фаолият юритадиган ўқитувчиларнинг базавий тариф ставкаларига 50 фоиз;
  бошқа вилоятдан келиб фаолият юритаётган ўқитувчиларнинг базавий тариф ставкаларига 100 фоиз устама.

Агар педагог амалда ишлаётган иш жойида директор жамғармаси ҳисобидан устама олаётган бўлса, бу устамалар таълим сифати паст бўлган мактабда иш бошлаган тақдирда ҳам бир ўқув йили давомида сақланиб қолади.