Samarqand viloyatining Ishtixon tumanida Epica avtomobili temir to'siqqa urilishi oqibatida haydovchi voqea joyida vafot etdi. Bu haqda Samarqand viloyati Yo'l harakati xavfsizligi boshqarmasi xabar berdi.

Malum qilinishicha, yo'l-transport hodisasi kecha, 28 oktyabr kuni soat 21:00 larda tumanning “Qo'ng'irot” mahallasi hududidan o'tuvchi D-076 avtomobil yo'lining 80-kilometrida sodir bo'lgan.

Epica haydovchisi Ishtixon–Payshanba yo'nalishida harakatlanayotib, etiborsizlik oqibatida rul boshqaruvini yo'qotgan va yo'lning o'ng tomonidagi temir to'siqqa urilgan. Oqibatda haydovchi og'ir tan jarohatlari olib, voqea joyida halok bo'lgan.

Bildirilishicha, holat yuzasidan Ishtixon tumani IIB Tergov bo'limi tomonidan jinoyat ishi qo'zg'atilgan. Hozirda dastlabki tergov harakatlari olib borilmoqda.

Eslatib o'tamiz, avvalroq Qashqadaryo viloyatining Shahrisabz tumanida VAZ-2105 rusumli avtomobil daraxtga urilishi oqibatida 20 yoshli haydovchi vafot etgandi.