Ўзбекистон ҳукумати шахсий эҳтиёж учун биологик фаол қўшимчаларни (БАДлар) олиб киришга чекловлар киритади. Тамаки ва парфюмерия маҳсулотлари учун бож олинмайдиган чегара ҳам қайта кўриб чиқилмоқда.

2025 йил 20 июлдан бошлаб Ўзбекистонда жисмоний шахслар томонидан шахсий эҳтиёж учун биологик фаол қўшимчаларни (БАДлар) божсиз олиб кириш қоидалари жорий этилади. 

Бу Вазирлар Маҳкамасининг 19 апрелдаги қарорида назарда тутилган.

Аввал хабар қилинганидек, мазкур ҳужжат 1 майдан бошлаб Ўзбекистонда жисмоний шахслар учун товарларни божсиз олиб кириш қоидаларини кучайтиради: аэропортлар орқали — 1000 долларгача (ҳозир $2000), темирйўл орқали — 500 долларгача ($1000). Куьрерлик жўнатмалари орқали етказиб бериладиган товарлар учун ставка ҳар чоракда 1000 доллардан ойига 200 долларгача қисқартирилади. 

Божсиз олиб кириш учун хорижда бўлишнинг минимал муддатлари ҳам жорий этилмоқда.

Ҳужжатга кўра, эндиликда жисмоний шахслар озиқ-овқат қўшимчаларини қуйидаги миқдорда божхона тўловларисиз олиб киришлари мумкин бўлади (шу пайтгача ҳеч қандай чекловлар йўқ эди):
        суюқ ҳолатида ва сироп шаклида — 10 донагача флаконда;
        кукун ҳолатида — 0,5 килограммгача;
        таблетка — 100 донагача;
        капсула — 100 донагача ёки 4 донагача ПЕТ идишларда;
        қуритилган ҳолатда (ўсимлик гули, тана қисми ва илдизи) — 0,5 килограммгача.
Бундан ташқари, қарорда бошқа бир қатор товарларни божсиз олиб кириш қоидаларига ҳам аниқлик киритилди ёки ўзгартирилди.


Хусусан, спиртли ичимликлар учун миқдор бир хил — 2 литргача бўлиб қолади. Тамаки маҳсулотлари учун умумий чегара 10 та пакет ўрнига қуйидаги аниқ нормалар жорий этилади:

        сигареталар — 200 донагача;
        сигаралар — 5 донагача;
        тамаки — 100 граммгача.

Атир ва ифор тарқатувчи сувлар эса энди ҳар бири 300 мл гача бўлган 3 дона идишни олиб киришга рухсат берилади (илгари ҳажмини кўрсатмасдан 3 донагача эди).