Ўзбекистонда дори воситаларини рецептсиз сотганлик учун жавобгарлик кучайтирилиши мумкин

Алишер Қодировнинг айтишича, фармацевтика бозорида фойда олишни одамлар саломатлигидан устун қўядиган инсофсиз бизнес амалиётлари шаклланган.

"Миллий тикланиш" партияси етакчиси Алишер Қодиров дори воситаларини рецептсиз сотганлик учун жавобгарликни кучайтириш бўйича таклиф тайёрланаётганини маълум қилди.

"Жуда катта фармацевтика бизнеси бор. Унинг ҳисобига пул ишлашади. Одамларнинг саломатлиги эса биринчи даражали масала эмас. Асосийси - дори сотиш. Дори сотиш, дори сотиш... Буни ўзимиз бевосита амалда кўрганимиз учун айтаяпмиз.
Масалан, қандли диабет касаллигини олайлик. Агар қандли диабет билан оғриган одамда ҳеч бўлмаганда битта яра пайдо бўлса, у қаттиқ азоб чекади. Мана шундай бир беморни даволаш учун унга 5-6 млн сўмлик дори-дармон ёзилади. Буни ўз кўзимиз билан кўриб турибмиз: вилоятлардан одамлар келиб, уларга дори-дармон ёзиб беришади, шундан сўнг улар бу қандли диабет билан бирга ўлишга ҳам тайёр.

Бу 5 млн лик дорилар таркибига нималар киришини кўрсангиз, БАДлар - биологик фаол қўшимчалар бўлиб чиқади. БАДларнинг диабетга қандай алоқаси бор? "У ерда" ўтирган одамлар айнан дори-дармон бизнеси билан шуғулланади. Баъзи дорилар одамга тетиклик ҳиссини берса, баъзилари яна нимадир бериши мумкин... Билмадим, ҳозир гап бу ҳақда эмас. Гап Ўзбекистонда касал одамни товарга айлантириш тушунчасининг ўзини йўқ қилиш кераклиги ҳақида кетмоқда.

Кучли таъсир қилувчи дори воситаларига келсак: депутатлар ташаббус билан чиққач, жарималарни оширишнинг ўзи етарли эмас. Агар "қизил рецепт" тўхтатса ва таъсир кўрсатса, демак, дорихоналарда рецептсиз умуман сотиб олишнинг иложи бўлмаслиги учун антибиотиклар ва умуман барча дориларни "қизил рецепт"га ўтказиш керак," - деди депутат.

Унинг қайд этишича, дори воситаларини рецептсиз сотишни тақиқловчи тартибнинг кучайтирилиши атрофида тарғибот ва қаршиликлар кўп бўлади.