ТИВ нота бериш билангина чекланиб қолмоқда – Шавкат Мирзиёев

Президент Шавкат Мирзиёев раислигида ўтказилган навбатдаги йиғилишда фуқароларнинг хорижий давлатларда ўтказилаётган турли рейд ва текширувлар пайтида ҳуқуқлари бузилаётгани ҳақидаги хабарлар жамоатчиликда жиддий норозилик уйғотаётганига эътибор қаратилди.

Давлат раҳбари сўнгги вақтларда айрим мамлакатларда меҳнат қилаётган ўзбекистонликлар турли рейдлар вақтида асоссиз ушлаб турилиши, камситилиши, ҳужжатларини текшириш баҳонасида босимга учраётгани ҳақида мурожаатлар кўпайганини таъкидлади. Бу каби ҳолатлар фуқароларнинг шаъни ва қадр-қимматига путур етказаётгани, мамлакат имиджига ҳам салбий таъсир кўрсатаётгани қайд этилди.

Президент ташқи ишлар вазирлиги фаолиятини танқид қилиб, бу борада фақат дипломатик нота бериш билан чекланиб қолинаётганини, аммо амалий натижа сезилмаётганини билдирди.

“Фуқароларимизнинг ҳуқуқлари поймол бўлаётган бир пайтда, ТИВ фақат нота бериш билан чекланиб қолмоқда. Бу етарли эмас. Ҳар бир фуқаро давлат ҳимоясида эканини ҳис қилиши керак”, — деди Шавкат Мирзиёев.

Йиғилишда таъкидланишича, хориждаги дипломатик ваколатхоналар фаолиятини кучайтириш, уларнинг масъулиятини ошириш, фуқароларга реал ёрдам кўрсатиш тизимини шакллантириш зарур. Консуллик хизматлари ишини қайта кўриб чиқиш, мурожаатларга тезкор жавоб бериш, ҳуқуқни муҳофаза қилувчи органлар билан яқин ҳамкорликни йўлга қўйиш вазифалари белгилаб берилди.

Шунингдек, меҳнат муҳожирлари билан ишлаш бўйича аниқ механизмларни ишлаб чиқиш, уларни ҳуқуқий жиҳатдан ҳимоя қилиш, зарур ҳолларда адвокатлик ёрдами билан таъминлаш масалалари ҳам кўтарилди. Президент фуқароларни қийин вазиятда қолдирмаслик, ҳар бир мурожаат ортида инсон тақдири турганини унутмаслик лозимлигини алоҳида таъкидлади.

Йиғилиш якунида масъул идораларга хориждаги ўзбекистонликлар ҳуқуқларини ҳимоя қилиш бўйича аниқ чора-тадбирлар режасини ишлаб чиқиш, дипломатик каналлар орқали эмас, амалий ҳаракатлар билан натижа кўрсатиш топширилди.