Legatum Prosperity Index’нинг 2026 йилги янгиланган рейтингида Ўзбекистон дунёнинг 161 та давлатлари орасида 94-ўринни эгаллади. Бу ҳақда “Prosperity Index” хабар берди.

Жадвал таҳлилига кўра, Ўзбекистоннинг энг кучли кўрсаткичи маҳаллий ҳамжамият йўналишида бўлиб, мамлакат 19-ўринни эгаллаган. Шунингдек, таълим (37-ўрин), ижтимоий ҳамжиҳатлик (49-ўрин) ва ижтимоий муносабатлар (52-ўрин) бўйича ҳам нисбатан яхши натижа қайд этилган.

Бироқ мамлакатнинг энг заиф йўналиши мулк ҳуқуқи бўлиб, ушбу мезон бўйича Ўзбекистон 136-ўринни эгаллаган. Шунингдек, иқтисодий эркинлик (131-ўрин), хавфсизлик (126-ўрин) ва шахсий эркинлик (105-ўрин) йўналишларидаги натижалар ҳам пастлигича қолмоқда.

2023 йил билан таққослаганда, айрим кўрсаткичларда ижобий силжиш кузатилган. Жумладан, фаровонлик рейтинги 92-ўриндан 90-ўринга, бойлик 104-ўриндан 103-ўринга, иқтисодий эркинлик 132-ўриндан 131-ўринга яхшиланган. Ижтимоий ҳамжиҳатлик ҳам 51-ўриндан 49-ўринга кўтарилган.

Шу билан бирга, бир қатор йўналишларда пасайиш қайд этилган. Хусусан, шахсий эркинлик 97-ўриндан 105-ўринга, оила 50-ўриндан 59-ўринга, маҳаллий ҳамжамият 13-ўриндан 19-ўринга, ижтимоий муносабатлар 50-ўриндан 52-ўринга, давлат институтларига ишонч эса 76-ўриндан 77-ўринга тушган. Соғлиқни сақлаш (83-ўрин), таълим (37-ўрин), хавфсизлик (126-ўрин) ва мулк ҳуқуқи (136-ўрин) кўрсаткичлари эса ўтган йилга нисбатан ўзгармаган.

Рейтингнинг илк уч поғонасини Швейцария, Норвегия ва Ирландия эгаллаган.

Марказий Осиё давлатлари орасида энг юқори натижани Қозоғистон қайд этиб, 66-ўриндан жой олган. Ундан кейин Қирғизистон 87-ўрин билан минтақада иккинчи, Ўзбекистон эса 94-ўрин билан учинчи бўлди. Тожикистон 129-ўрин, Туркманистон 150-ўрин ва Афғонистон 155-ўриндан жой олган.

Ўзбекистон айрим иқтисодий ва сиёсий жиҳатдан ривожланган давлатлардан юқори ўринни эгаллади. Хусусан, рейтингда Саудия Арабистони 97-ўрин, Туркия 102-ўрин, Россия 103-ўрин, Озарбайжон 105-ўрин ва Хитой 110-ўриндан жой олган. Бу давлатларнинг барчаси Ўзбекистондан кейинги поғоналарда қайд этилган.

Эслатиб ўтамиз, аввалроқ Ўзбекистон соғлиқни сақлаш тизими сифати бўйича халқаро рейтингда 49-ўринни эгаллагани ҳақида хабар берилган эди.