Иккинчи жаҳон уруши даврида иттифоқчи бўлган Германия ва Япония ҳозирда фаол равишда қайта қуролланмоқда ва ўзаро алоқаларини мустаҳкамламоқда. Бу ҳақда “New York Times” нашри хабар берди.

Нашрнинг қайд этишича, ҳар иккала мамлакат ҳам айни пайтда АҚШга нисбатан эҳтиёткорлик билан муносабатда бўлмоқда, уларнинг Хитой ва Россия борасидаги хавотирлари эса кучайиб бормоқда. Берлин ва Токио ўртасидаги ҳамкорлик “Катта еттилик” (G7) давлатлари раҳбарларининг яқинлашиб келаётган учрашувида янада кучайиши кутилмоқда. Томонлар аллақачон технологиялар ва қурол-яроғ алмашишни бошлаб юборган.

“Бу сафар Япония ва Германия мудофаа нуқтаи назаридан бирлашмоқда: Берлин Украинанинг Россияга қарши ҳаракатларини қўллаб-қувватламоқда, Токио эса Хитой ва Шимолий Корея томонидан бўлаётган таҳдидлардан хавсирамоқда. Улар шунга ўхшаш қарашларга эга бўлган бошқа “ўрта кучлар” сафига қўшилмоқдалар”, дейилади хабарда.

Шунингдек, журналистларнинг сўзларига кўра, сўнгги йилларда ҳар икки давлатда ҳам тинчлик, дипломатия, эркин савдо ва маданий алмашинув ғояларини илгари сурувчи антимилитаристик ҳаракатлар заифлашган. АҚШ Президенти Дональд Трампнинг Европада хавфсизликни таъминлашдан воз кечиш билан таҳдид қилгани эса икки давлатнинг қайта қуролланишга бўлган интилишини тезлаштирган.

ОАВнинг эслатишича, Япония Бош вазири Санаэ Такаити мамлакат жанубида Хитойгача етиб боришга қодир бўлган узоқ масофали ракеталарни жойлаштирди ва урушдан кейинги қурол экспортига қўйилган тақиқларни бекор қилган. Бундан ташқари, Япония Австралияга ҳарбий кемалар етказиб бериш бўйича 6,5 миллиард долларлик шартнома имзолаган ҳамда Филиппин ва Индонезия билан уларни экспорт қилиш бўйича музокаралар олиб бормоқда.

Шу билан бирга, 2026 йилнинг баҳорида Токиода ўн минглаб одамлар қурол экспортини ошириш ва миллий разведка агентлигини ташкил этиш ҳақидаги қарорларга қарши норозилик намойишларига чиққанди. Намойиш ташкилотчиларидан бири Нахоко Хисияма “Такаитининг сиёсати чуқур хавотир уйғотаётганини, чунки у Японияни ҳарбий давлатга айлантиришга қаратилганини” билдирган.