Россияда банкомат ва тўлов терминалларининг интернетсиз ишлаш механизми ишлаб чиқилди

Манба: “Ria Novosti”

Россия Рақамли ривожланиш, алоқа ва оммавий коммуникациялар вазирлиги ҳамда телеком операторлари банкоматлар ва тўлов терминалларининг мобил интернетсиз ишлашига имкон берувчи механизмларни ишлаб чиқди. Бу ҳақда Марказий банк раиси Элвира Набиуллинага таяниб “РБК” хабар берди.

“Рақамли ривожланиш вазирлиги билан доимий алоқадамиз. Бизга барча томонларни қўллаб-қувватлайдиган ечимлар керак. Яхши янгилик бор: Рақамли ривожланиш вазирлиги алоқа операторлари билан биргаликда мобил интернет ўчирилган тақдирда ҳам, банкоматлар ва тўлов терминалларининг ишлашига имкон берувчи техник ечимларни ишлаб чиқди. Ўйлайманки, бу муаммонинг катта қисмини ҳал қилади”, деди Набиуллина.

У, шунингдек, Марказий банк ва Рақамли ривожланиш вазирлиги Россиянинг барча банкларини “оқ рўйхат”га киритиш имкониятини муҳокама қилаётганини айтди.

“Барча лицензияланган кредит ташкилотларининг ушбу ‘оқ рўйхат’га киритилиши идеал ва тўғри ҳолатдир. Бу узлуксизликни кафолатлайди. Бирор ташкилот рўйхатга киритилмаса, у муайян имкониятларни йўқотади. Бу, албатта, ёқимсиз ҳолат. Аммо биз технологиянинг мавжуд чекловларини ҳам тушунамиз”, деди у.

Набиуллинага кўра, Марказий банк ҳозирча барча банкларни ушбу рўйхатга улай олмайди. Шу сабабли жараён босқичма-босқич амалга оширилади. Биринчи босқичга, табиийки, йирик, тизимли аҳамиятга эга ва ўта муҳим хизматлар киритилади.

“Бу нафақат банкларга, балки суғуртачиларга ҳам тегишли. Жараён аниқ тушунарли бўлиши учун ҳозирда мезонларни кўриб, ишлаб чиқяпмиз. Шу билан бирга, биз бундай босқичма-босқич ёндашувнинг камчиликларини ҳам тушунамиз”, дея хулоса қилди у.

“Оқ рўйхат”га қайси хизматлар киради?
“Оқ рўйхат”га киритилган хизматлар мобил интернет чекланган даврда ҳам фойдаланувчилар учун очиқлигича қолади. Уларга давлат хизматлари, банклар, транспорт хизматлари, Россия қидирув тизимлари ва маркетплейслар (савдо майдончалари) киради.

Ҳозиргача Россиянинг фақат бешта банки оқ рўйхатга киритилган. Булар: “ВТБ”, “Алфа-Банк”, “ПСБ”, “МТС Банк” ва “Газпромбанк”. Марказий банк маълумотларига кўра, Россияда жами 305 та банк фаолият кўрсатмоқда.
Март ойида Набиуллина фақат бир нечта банкнинг “оқ рўйхат”га киритилишини адолатли рақобатнинг бузилиши деб атаган эди. Марказий банк фикрича, барча лицензияланган банклар ушбу рўйхатдан жой олиши керак.