Азов денгизида дронлар ҳужуми оқибатида 5 озарбайжонлик ҳалок бўлди

Бугун, 5 июнга ўтар кечаси Азов денгизининг Таганрог қўлтиғида дронлар иккита юк кемаси – “Натра” ва “Циркон” теплоходларига ҳужум қилди. Ҳодиса оқибатида беш нафар озарбайжонлик ҳалок бўлди, яна уч киши жароҳатланди. Бу ҳақда Озарбайжон Ташқи ишлар вазирлиги хабар берди.

Вазирлик маълумотларига кўра, кемалар бортида жами 25 нафар Озарбайжон фуқароси бўлган, бироқ кемаларнинг ўзи ушбу мамлакатга тегишли бўлмаган. Улар Палау ва Белиз байроқлари остида сузган ҳамда Туркиядан Ростов-Дон шаҳрига ғалла ортиш учун кетаётган бўлган.

“Натра” кемасига тўртта дрон бориб урилган, шундан сўнг бортда ёнғин чиққан ва экипаж уни ўз кучи билан ўчиришга муваффақ бўлган. Кема чўкмаган, бироқ шатакка олишга муҳтож. “Циркон” кемасига ҳам тўртта зарба берилган. Экипаж чўкаётган кемани қутқарув қайиқларида тарк этган. Омон қолган денгизчиларни фалокат жойи яқинидан ўтиб кетаётган учта кема қутқариб олган. Эрталабга яқин қутқарилган денгизчилар Ейск портига етказилган, ярадорлар шифохонага ётқизилган. Шикастланган “Натра” кемасини шатакка олиш учун иккита кема йўлга чиққан. Фавқулодда ҳодиса жойига Озарбайжоннинг Россиядаги элчихонасининг бир нечта ходими жўнаб кетган.

Россия ТИВ Азов денгизидаги юк кемаларига қилинган дронлар ҳужуми ортида Украина турганини даъво қилган. 

“Биз Қора денгиз ва Ўрта ер денгизи акваториясида тинч аҳоли фуқаролик кемаларига ҳаво ва денгиз дронлари ёрдамида ким ҳужум қилаётганини яхши биламиз. Бу, таъбир жоиз бўлса, ҳаммага маълум мамлакат. Тўғрироғи, ўша мамлакатда ҳокимиятни эгаллаб олган режимдир”, дейди Россия Ташқи ишлар вазири ўринбосари Михаил Галузин.

Россия Мудофаа вазирлигининг баёнотига кўра, ўтган кечада мамлакат ҳудуди узра Украинанинг 123 та учувчисиз учиш аппарати “йўқ қилинган ва тутиб қолинган”. Уларнинг бир қисми Азов денгизи акваторияси устида уриб туширилган. Украина Қуролли кучларининг Учувчисиз тизимлар кучлари эса тунги ҳужум давомида вақтинча босиб олинган Мариуполь ва Бердянск портларида, шунингдек, соҳилбўйи сувларида Россиянинг бешта кемасига зарба берилганини маълум қилган.

“Оккупантнинг контрабанда логистикасини тўхтатиш керак”, дейди учувчисиз қўшинлар қўмондони Роберт “Мадяр” Бровди ўзининг Telegram-каналида.