АҚШ Адлия вазирлиги Нью-Йоркдаги ўзбекона услубдаги “Poetica Coffee” қаҳвахоналар тармоғи устидан фуқаролик ҳуқуқлари бўйича текширув бошлади. Бунга тармоқнинг Исроилни қўллаб-қувватловчи демократ конгрессмен Дэн Голдманга хизмат кўрсатмаслигини маълум қилгани сабаб бўлган. Бу ҳақда “Al Jazeera” хабар берди.

Адлия вазирлигининг Фуқаролик ҳуқуқлари бўлими раҳбари Ҳармит К. Дҳиллоннинг айтишича, текширув қаҳвахона тармоғи ижтимоий тармоқларда Голдманни ўз филиалларида кўришни истамаслигини билдирганидан кейин бошланган.

“Бу ҳаракатлар нафақат қораланиши лозим, балки қонунга зид бўлиши ҳам мумкин”, деган у.

Бруклин ва Ист-Виллижда еттита филиалга эга бўлган “Poetica Coffee” Дэн Голдман қизини эргаштириб қаҳвахоналаридан бирига келганидан кейин Facebook ва Instagram саҳифаларида баёнот берган.

“Бугун қаҳва ичиш учун дўконимизга кирганингизни кўрдик. Геноцид шарбатининг таъмига ўхшамаслигини сездингизми ёки ҳали ҳам фарқни ажрата олмаяпсизми?

Poetica’да ирқчиларга, фашистларга, гомофобларга, геноцидни қўллаб-қувватловчиларга ва уларнинг орасидаги ҳеч кимга хизмат кўрсатилмайди. Афсуски, сизни дарров танимабмиз, акс ҳолда киритмаган бўлардик”, дейилган постда.

Шунингдек, қаҳвахона Голдман сарфлаган 9,82 доллар қайтариб берилганини ва унинг қайта келмаслигини исташини билдирган.

CNN телеканалига берган интервьюсида Голдман бу ҳолатдан афсусланганини айтган.

“Менимча, биз одоб-ахлоқ, муносабат маданияти ва оддий инсонпарварлик борасидаги тушунчаларимизни йўқотиб қўйдик”, деган у.

Бироқ конгрессмен қаҳвахона тармоғини текшириш керак деб ҳисобламаслигини ҳам қўшимча қилган.

Маълум қилинишича, АҚШ федерал қонунчилиги ва Нью-Йорк штати қонунлари бизнес субъектларига ирқ, дин, жинс ёки миллий келиб чиқиш асосида хизмат кўрсатишни рад этишни тақиқлайди. Аммо бу ҳимоя сиёсий қарашлар ёки мафкурага нисбатан татбиқ этилмайди.

Дэн Голдман Демократик партия ичида Исроилни очиқ қўллаб-қувватловчи сиёсатчилардан бири ҳисобланади. У ўзини “фахрли сионист ва Исроилнинг қатъий тарафдори” деб таърифлаган.

Шу билан бирга, у Ғазода геноцид содир бўлаётганини рад этган бўлса-да, вазиятни “даҳшатли” деб баҳолаган ва жанговар ҳаракатларни тўхтатишга чақирган. Голдман, шунингдек, Исроил Бош вазири Биньямин Нетаньяҳу ҳукуматини “экстремистик” деб атаб, Ғарбий соҳилдаги яҳудий манзилгоҳларини кенгайтиришга қарши чиққан.