Хитойнинг жануби-шарқидаги Фуцзянь вилоятида жойлашган пойабзал фабрикасида чиққан ёнғин оқибатида камида 28 киши ҳалок бўлди. Бу ҳақда “Синьхуа” агентлиги хабар берди.

Ёнғин кеча, 9 июль куни маҳаллий вақт билан соат 12:00 атрофида Фуцзянь вилоятининг Цзиньцзян шаҳридаги “Huiteng” пойабзал ишлаб чиқариш корхонасида содир бўлган. Кўп қаватли бинони аланга қамраб олгани оқибатида бир гуруҳ ишчилар томда қолиб кетган.

Агентлик маълумотига кўра, ёнғин бошланган вақтда фабрикада жами 239 нафар киши бўлган. Уларнинг 213 нафари эвакуация қилинган. Шифохонага олиб кетилган икки киши кейинчалик вафот этган. Илгари бедарак деб ҳисобланган яна 26 кишининг жасади топилган.

Қайд этилишича, Хитой раиси Си Цзиньпин зудлик билан кенг кўламли қутқарув ишларини ташкил этиш бўйича кўрсатма берган. У сўнгги ойларда мамлакатда ишлаб чиқариш корхоналарида бир қатор ҳалокатли бахтсиз ҳодисалар юз берганини эслаб, бу ёнғин ҳам катта қурбонларга сабаб бўлганини таъкидлаган ҳамда айбдорларни қонун асосида қатъий жавобгарликка тортишни талаб қилган.

Дастлабки текширувларга кўра, ёнғин фабриканинг биринчи қаватида бошланган. Расмийлар пойабзал ишлаб чиқаришда қўлланиладиган материаллар ва хомашёлар ўта ёнувчан бўлгани учун аланга жуда тез тарқалганини билдирган.

CCTV маълум қилишича, корхонада сақланган ёпиштирувчи моддалар ва бошқа кимёвий материаллар ўткир ҳид тарқатиб, қутқарувчиларнинг кўзларини ачиштирган. Шунингдек, зинапояларда катта миқдорда турли буюмлар тўпланиб қолгани қутқарув ва ёнғинни ўчириш ишларини қийинлаштирган. Хабар берилишича, компания раҳбарлари ва бошқа масъул шахслар қўлга олинган, корхонанинг банк ҳисобрақамлари музлатилган.

Маълумот учун, Цзиньцзян шаҳри Хитойнинг энг йирик пойабзал ва кийим-кечак ишлаб чиқариш марказларидан бири бўлиб, кўпинча мамлакатнинг “пойабзал пойтахти” деб аталади. Расмий маълумотларга кўра, шаҳардаги минглаб корхоналар 2024 йилда 1,2 миллиард жуфтдан ортиқ пойабзал ишлаб чиқарган бўлиб, бу жаҳон умумий ишлаб чиқариш ҳажмининг тахминан 20 фоизини ташкил этган.

Эслатиб ўтамиз, аввалроқ Хитойнинг Хунань вилоятида жойлашган пиротехника заводида юз берган кучли портлаш оқибатида камида 21 киши ҳалок бўлиб, 61 нафар одам жароҳат олганди.