АҚШнинг Калифорния штатидаги Сан-Франциско кўрфазида, Алкатраз ороли яқинида 19 кишини олиб кетаётган понтон қайиғи чўкиб кетиши оқибатида бир киши ҳалок бўлди, яна икки киши бедарак йўқолди. Бу ҳақда “Associated Press” хабар берди.

Қайд этилишича, ҳодиса 14 июль куни маҳаллий вақт билан соат 15:30 атрофида содир бўлган. Сан-Франциско ёнғин хизмати бошлиғи Дин Криспеннинг айтишича, воқеа жойига етиб келган қутқарувчилар уч қаватли понтон қайиғини деярли тўлиқ сув остида қолган ҳолатда аниқлаган. Қайиқ двигатели ҳали ҳам ишлаб турган, ундан ёқилғи сизиб чиққан.

Дастлаб ҳодиса қайиқдаги ёнғин сифатида баҳоланган, бироқ кейинчалик мутахассислар буни тасдиқловчи далиллар топилмаганини маълум қилган.

Ҳодиса оқибатида 16 киши қутқарилган. Улардан уч нафари турли тан жароҳатлари билан шифохонага ётқизилган. Совуқ сувдан чиқариб олинган бир киши шифокорлар саъй-ҳаракатларига қарамай вафот этган. Қайиқ бортидаги ит ҳам нобуд бўлган.

Ҳозирда АҚШ Соҳил хавфсизлик хизмати, Сан-Франциско ёнғин хизмати ҳамда бошқа қутқарув бўлинмалари икки нафар бедарак йўқолган йўловчини қидиришни давом эттирмоқда. Қидирув ишларига ғаввослар, вертолётлар ва 11 та қутқарув кемаси жалб этилган.

Гувоҳларнинг айтишича, ҳодиса вақтида кўрфазда кучли шамол ва тўлқин кузатилган. Сайёҳларни олиб кетаётган Bass-Tub кемаси капитани Арон Анфинсоннинг сўзларига кўра, улар ёрдам сўраган кичик қайиқ экипажи ишораси билан воқеа жойига етиб борганида понтон қайиғи чўкаётган, айрим йўловчилар эса аллақачон сувга тушиб кетган эди. Қутқарувчилар ва яқин атрофдаги кемалар йўловчиларга қутқарув жилетларини тарқатиб, уларни сувдан олиб чиқишга ёрдам берган.

Ҳодиса сабаблари юзасидан тергов ҳаракатлари олиб борилмоқда.

Эслатиб ўтамиз, жорий йилнинг 11 июль куни Вьетнамнинг жанубидаги Фукуок ороли яқинида ҳиндистонлик сайёҳлар кетаётган катер ағдарилиб кетиши оқибатида 15 киши ҳалок бўлган эди.