АҚШ Президенти Дональд Трамп Хитойни Америка сайловларига аралашишда яна бир бор айблади. Бу ҳақда “Reuters” хабар берди.

Қайд этилишича, Трамп 16 июль куни республикачилар ноябрь ойидаги Конгресс сайловларига тайёрланаётган бир пайтда сайлов тизими ва унинг бошқарилиши ҳақидаги танқидларини яна такрорлаган. У асосий эътиборни Хитойга қаратиб, Пекин миллионлаб америкалик сайловчилар ҳақидаги маълумотларни ноқонуний тарзда қўлга киритганини иддао қилган. Бу айбловни Хитой аввал ҳам рад этганди.

Манбага кўра, мазкур баёнот Вашингтонда икки ойдан сўнг ўтказилиши режалаштирилган саммит арафасида Трамп ва Хитой раҳбари Си Цзиньпин ўртасидаги нозик муносабатларга салбий таъсир кўрсатиши мумкин.

“Бу маълумотларнинг йўқотилиши сайлов хавфсизлиги учун мисли кўрилмаган таҳдиддир”, деган Трамп.

Хитой Ташқи ишлар вазирлиги бу баёнот юзасидан ҳозирча изоҳ бермаган. Ундан аввал Хитойнинг Вашингтондаги элчихонаси вакили Лю Чан Пекин “ҳеч қачон АҚШ президентлик сайловларига аралашмаган ва бундай қилмайди”, деган эди.

Трамп Си Цзиньпин билан шахсий муносабатлари яхши эканини кўп бор таъкидлаб келган бўлса-да, бу сафар Хитойга нисбатан шахсий норозилигини ҳам яширмади.

“Хитой ҳукумати кейинги сайловда АҚШ Президенти мағлуб бўлишини истаган. Улар менинг ютқазишимни хоҳлашди, чунки мен уларнинг ниятларини яхши билардим”, деган у.

Прайм-таймда қилинган ушбу мурожаат Трампнинг сўнгги вақтларда Пекин ҳақида айтган нисбатан юмшоқ фикрларидан кескин фарқ қилди. Кузатувчиларнинг фикрича, бу чиқиш дунёнинг икки йирик иқтисодиёти ўртасида ўтган йилиги савдо уруши тўхтатилганидан кейин эришилган муросага ҳам путур етказиши мумкин.

Оқ уй ҳам Трампнинг баёноти АҚШ–Хитой муносабатларига қандай таъсир қилиши ҳақида изоҳ бермаган.

Пекиндаги дастлабки баҳолашлардан хабардор манбанинг сўзларига кўра, Трампнинг нутқи ташқи сиёсатни ўзгартиришдан кўра, ички сиёсий мақсадларга хизмат қилиш учун мўлжалланган.

Шунингдек, Трампнинг 25 дақиқалик нутқида Хитойга қарши янги жазо чораларини қўллашга чақириқ бўлмагани ҳам Пекиннинг муносабатини юмшатиши мумкин.

Бу Трампнинг Хитойни сайловларга аралашишда биринчи марта айблаши эмас. У бундан аввал ҳам 2020 йилги президентлик сайловлари сохталаштирилгани ҳақидаги исботланмаган даъволарини асослаш учун шундай айбловларни билдирган.

Эслатиб ўтамиз, аввалроқ АҚШ Президенти Дональд Трамп жорий йилнинг 13–15 май кунлари Хитойга давлат ташрифи билан борган эди.