АҚШ Президенти Дональд Трамп Эронга янги миқёсда зарбалар беришни кейинга сурди. Бу ҳақда исми ошкор қилинмаган манбаларига таяниб, “The New York Times” хабар берди.

Манбаларнинг сўзларига кўра, асосий сабаблардан бири Теҳроннинг жавоби АҚШни минтақадаги ҳаво ҳужумидан мудофаа тизимлари учун ракета захираларининг сезиларли даражада камайишига олиб келишидан хавотирланиш бўлган. Қарор Трампнинг маслаҳатчилари ва администрация аъзолари билан ўтказилган йиғилишидан сўнг қабул қилинган.

Газетанинг ёзишича, Штаб бошлиқлари бирлашган қўмитаси раиси, генерал Дэн Кейн Президентни кенг миқёсли ҳарбий ҳаракатларнинг қайта бошланиши мумкинлиги, аммо бу АҚШ Марказий қўмондонлиги ихтиёридаги тутиб қолувчи ракеталар захирасининг хавфли даражада қисқаришига олиб келиши ҳақида огоҳлантирган. Жорий йил апрель ойи охиридаги ҳолатга кўра, америкалик ҳарбийлар ҳар бирининг қиймати 4 миллион доллардан ошадиган 1,2 мингдан ортиқ Patriot тутиб қолувчи ракеталарини ишлатган. Сўнгги ҳафталарда захира билан боғлиқ вазият янада ёмонлашган.

Пентагон Яқин Шарқдаги Эроннинг қирғоқ радарлари, кемаларга қарши ракета қурилмалари, зарба берувчи катерлари ва бошқа объектларига қарши кўп босқичли кампания тайёрлаётган бўлган. Энергетика ва ядровий инфратузилмага зарба бериш имкониятлари ҳам кўриб чиқилган. Бироқ Трампнинг маслаҳатчилари уни урушнинг янада кенгайиши, Эроннинг уларнинг ҳудудига уюштирган ҳужумлари сабабли Форс кўрфазидаги асосий иттифоқчиларнинг “узоқлашиши”, энергия ресурслари нархининг ошиши ва жаҳон иқтисодиётидаги вазиятнинг ёмонлашуви хавфидан огоҳлантирган.

Кеча, 25 июль куни АҚШ кетма-кет 13 кечалик ҳужумлардан сўнг, икки ҳафта ичида биринчи марта Эронга тунги зарбалар бермади. Шу билан бирга, Америка ҳарбийлари томонидан Эрон портларига қўйилган денгиз блокадаси ўз кучида қолмоқда.

Эслатиб ўтамиз, аввалроқ Ислом инқилоби қўриқчилари корпуси генерали ва ташкилотнинг расмий вакили АҚШни қўллаб-қувватлаган ҳар қандай давлат Эроннинг нишонига айланиши ҳақида огоҳлантиргани ҳақида хабар берилган эди.