АҚШ Давлат департаменти 175 мингдан ортиқ хорижликнинг визасини бекор қилди. Уларнинг аксарияти жиноят содир этгани ёки виза шартларини бузгани сабабли мамлакатга кириш ҳуқуқидан маҳрум қилинган. Бу ҳақда “Reuters” хабар берди.

Қайд этилишича, виза шартларини бузган, жиноят содир этган, АҚШ фуқароларига нисбатан зўравонликка чақирган, америкаликларни алдаган ёки миллий хавфсизликка хавф туғдирган шахсларга нисбатан бекор қилинган.

Маълумотларга кўра, визаларнинг аксарияти ҳуқуқни муҳофаза қилувчи органлар билан боғлиқ ҳодисалардан сўнг бекор қилинган. Улар орасида ҳужум, маст ҳолда автомобил бошқариш, ўғрилик ва гиёҳванд моддалар билан боғлиқ жиноятлар асосий ўринни эгаллаган.

Департамент айрим ҳолатларни ҳам мисол сифатида келтирган. Жумладан, оғир зўрлаш ва жинсий тажовузда, одам ўғирлаш ва одам савдосида айбланган шахсларнинг визалари бекор қилинган. Шунингдек, болаларга нисбатан жинсий зўравонлик материалларини сақлашда ўндан ортиқ айбловга дуч келган шахснинг визаси ҳам бекор қилинган.

Бундан ташқари, Шимолий Африкадаги АҚШ элчихонаси фарзандлари мамлакат фуқаролигини олиши учун Америкага туғиш мақсадида келган “туғилиш сайёҳлари”нинг 100 дан ортиқ визасини бекор қилган.

Давлат департаменти, шунингдек, консерватив фаол Чарли Киркнинг ўлдирилишини ижтимоий тармоқларда нишонлаган бир нечта хорижликларнинг визалари ҳам бекор қилинганини маълум қилган.

Бу Трамп маъмуриятининг визаларни оммавий бекор қилиш бўйича илк ҳолати эмас. Жорий йилнинг январь ойида департамент 100 мингдан ортиқ визани бекор қилганини билдирган эди.

Нашрнинг қайд этишича, визаларнинг бекор қилиниши Трампнинг Оқ уйга қайтганидан кейин бошланган иммиграцияга қарши кенг кўламли сиёсатининг бир қисми ҳисобланади. Маъмурият виза бериш талабларини ва иммиграция назоратини кучайтирган ҳамда ижтимоий тармоқларни текширишни кенгайтирган.

Ҳуқуқ ҳимоячилари ва инсон ҳуқуқлари бўйича мутахассислар эса АҚШ ҳукуматининг ижтимоий тармоқларни текшириш сиёсатини танқид қилиб, бу амалиёт сўз эркинлигига таҳдид солиши мумкинлигини билдирган.

Эслатиб ўтамиз, аввалроқ АҚШ Президенти Дональд Трамп мамлакатда туғилиш орқали фуқаролик олиш амалиётини чеклаш ва Америка фуқаролигининг қадрини ҳимоя қилишга қаратилган иккита ижро фармонини имзолаганлиги ҳақида хабар берилган эди.