Португалия пойтахти Лиссабон 47 та шаҳар ўрганилган глобал рейтингда саёҳат учун дунёнинг энг бахтли манзили деб топилди. Бу ҳақда “Euronews” хабар берди.

Қайд этилишича, “Holiday Happiness Index” рейтинги “BookRetreats” платформаси томонидан тузилган. Унда саёҳат вақтида инсонларнинг фаровонлигига таъсир қилувчи омиллар, жумладан, қуёш нури, пиёда ҳаракатланиш қулайлиги, яшил ҳудудлар, соғлом озиқ-овқат ва уйқу сифати баҳоланган.

Тадқиқотга Натали Даттило-Райан раҳбарлик қилган. У Гарвард университети билан боғлиқ клиник психолог бўлиб, яхлит бахт тушунчаси бўйича мутахассис ҳисобланади. Лиссабон рейтингда айниқса овқатланиш имкониятлари билан ажралиб турган.

Тадқиқотга кўра, шаҳардаги ресторанларнинг қарийб 10 фоизи соғлом овқатланиш тоифасига киради. Бу кўрсаткич рейтингдаги иккинчи энг юқори натижа бўлиб, Лиссабон Париж, Токио ва Нью-Йорк каби йирик гастрономик марказлардан олдинда қайд этилган. Шунингдек, шаҳарда турли хил таомларни нисбатан ҳамёнбоп нархларда топиш мумкинлиги таъкидланган.

Тадқиқотда Лиссабон бўйлаб пиёда ҳаракатланиш ҳам қулай экани қайд этилган. Шаҳарнинг нотекис релъефига қарамай, у ихчам бўлиб, пиёда сайр қилиш учун мос экани ва сайёҳларга манзарали нуқталарни томоша қилиш имконини бериши айтилган.

Лиссабонда ҳар бир аҳолига ўртача 49 квадрат метр яшил ҳудуд тўғри келади. Бу Мадрид кўрсаткичидан қарийб тўрт баробар кўп. Бундан ташқари, Кашкайш ва Коста-да-Капарика пляжларига жамоат транспортида бир соатдан камроқ вақтда етиб бориш мумкин.

Шаҳар йилига тахминан 2 828 соат қуёш нури олади. Тадқиқот муаллифлари буни ҳам инсон кайфиятига ижобий таъсир қилувчи омиллардан бири сифатида кўрсатган. Рейтингда Лиссабондан кейинги ўринларни Хельсинки ва АҚШнинг Орландо шаҳарлари эгаллаган.

Кучли ўнталикдан, Орландодан ташқари, фақат Европа шаҳарлари жой олган. Тўртинчи ўриндан бошлаб Афина, Эдинбург, Мадрид, Вена, Будапешт, Осло ва Вильнюс қайд этилган.

Эслатиб ўтамиз, аввалроқ Эстония яшаш учун энг яхши давлатлар рейтингида биринчи ўринни эгаллагани ҳақида хабар берилган эди.