Украина Хитойнинг режасини рад этди

Хитой Украинага тинчликпарвар кучларини юбормоқчи. Расмий Киев эса Пекиннинг Украина учун хавфсизлик кафолатида иштирокига рўйхушлик бермаётир.

Германия матбуоти ёзишича, Хитой тинчлик миссияси доирасида Украинага ҳарбийларини юборишга розилик берган. Тинчликпарвар кучлар БМТ мандати остида ҳаракат қилиши лозим деган шарт қўйилган.

Бир неча ой аввал Хитой ташқи ишлар вазирлиги Украинага тинчликпарвар кучлар юборилаётгани ҳақида хабарларни рад этганди. Бу гал ушбу тахмин жиддийроқ тарзда илгари сурилмоқда.
Европа Иттифоқи расмийлари, бир томондан, Глобал Жануб вакили бўлган Хитойнинг Украинада тинчлик ва барқарорликни ўрнатишда иштирок этишини ёқлаган. Иккинчи томондан, Чин ҳарбийлари Украинада жосуслик фаолияти билан шуғулланиши ва Россия фойдасига ишлаши эҳтимоли мавжуд.

Украина президенти Владимир Зеленский Киев хавфсизлик кафолати борасида Пекиннинг ёрдамига муҳтож эмаслигини айтмоқда. Унга кўра, Хитой 2022 йилда Россиянинг босқинини тўхтатишда кўмак бермади. 2014 йилда Россия Қримни ўз таркибига қўшиб олганида ҳам ҳеч қандай чора кўрмаган.

“Шу боис (2022 йил) 24 февралдан кейин, чиндан ҳам кўмак зарур бўлган вақтда Украинага ёрдам қўлини чўзмаганлардан бизга кафолат керак эмас”, – дея Хитойнинг истагини рад этган Зеленский.

15 август куни Аляска штатида АҚШ ва Россия президентлари Доналд Трамп ва Владимир Путиннинг учрашувидан кейин Украинага хавфсизлик кафолати бериш, жумладан, мамлакат ҳудудида Ғарб давлатлари тинчликпарвар контингентини жойлаштириш режаси фаол муҳокама этилмоқда.

Украина эса турли сабабларга кўра Хитойнинг бу борадаги кўмагидан бош тортмоқда.
Эслатиб ўтамиз, жорий йил июль ойида Reuters агентлиги Хитой санкция чораларига қарамай, Россияга яширин равишда ҳарбий дронлар учун двигатель етказиб беришда давом этаётгани ҳақида хабар берганди. Санкциялардан қочиш мақсадида двигателлар сохта компаниялар орқали “cаноат музлаткичлари учун эҳтиёт қисм” сифатида сотилаётгани айтилган.

Аввалроқ Bloomberg агентлиги Пекин Москвага ҳарбий нишонлар учун разведка маълумотлари, ҳарбий саноат учун микроэлектроника, танк ишлаб чиқариш учун керакли дастгоҳлар ва ракета ёнилғиси етказаётгани ҳақида таҳлилий материал чоп этганди.
Хитой расмийлари на Россия, на Украинага қурол сотмаслиги, бу борада мамлакат бетараф мақомда эканини таъкидлаган.