АҚШ ўз фуқароларини Эронни зудлик билан тарк этишга чақирди

АҚШ Давлат департаменти ва Теҳрондаги Виртуал элчихона Эрондаги Америка фуқароларига мамлакатни зудлик билан тарк этиш бўйича кескин огоҳлантириш билан чиқди. Бу Ислом Республикасида авж олаётган оммавий намойишлар, зўравонликлар ва интернетнинг бутунлай ўчириб қўйилиши билан изоҳланди. Бу ҳақда Newsweek хабар берди.
Душанба, 12 январь куни эълон қилинган ушбу огоҳлантириш Эронда ҳукуматга қарши намойишлар уч ҳафтадан бери давом этаётган бир пайтга тўғри келди. Халқаро ОАВ маълумотларига кўра, тўқнашувларда 500 дан ортиқ одам ҳалок бўлган, ўн минглаб кишилар ҳибсга олинган.
Давлат департаменти баёнотида таъкидланишича, Америка фуқаролиги бўлишининг ўзи Эрон расмийлари томонидан ҳибсга олиниш учун етарли сабаб бўлиши мумкин.

“АҚШ фуқаролари Эронни қуруқлик орқали Арманистон ёки Туркия йўналишида тарк этишни кўриб чиқишлари лозим. Ҳам АҚШ, ҳам Эрон фуқаролигига эга бўлган шахслар мамлакатдан Эрон паспортлари билан чиқиб кетишлари шарт”, дейилади огоҳлантиришда.

Яқин Шарқдаги ушбу давлатда давом этаётган тартибсизликлар фонида хавф даражаси ҳаддан ташқари кўтарилган. АҚШнинг Эронда элчихонаси ёки консуллиги мавжуд эмас. Теҳрондаги Швейцария элчихонаси фақат фавқулодда хизматларни кўрсатади, мунтазам консуллик ёрдами эса мавжуд эмас. Ҳибсга олинган АҚШ фуқаролари, айниқса дуал фуқароликка эга шахслар ташқаридан ёрдам олиш имкониятига деярли эга эмас.
Транспорт ва алоқадаги чекловлар
Теҳрондаги Виртуал элчихонанинг хавфсизлик огоҳлантиришида айтилишича, намойишлар миқёси кенгайиб бормоқда. Хавфсизлик чоралари кучайтирилган, йўллар ёпилган ва жамоат транспорти фаолияти тозаланган. Авиакомпаниялар рейсларни чекламоқда ёки бекор қилмоқда. Айрим авиаташувчилар парвозларни 16 январь, жума кунига қадар тўхтатган. Туркманистонга ўтмоқчи бўлганлар олдиндан рухсатнома олишлари талаб қилинади, Озарбайжонга киришда эса чекловлар бўлиши мумкин.
Бундан олдин Трамп норозилик намойишларининг шафқатсизларча бостирилиши фонида Эронга қарши эҳтимолий ҳужум вариантларини кўриб чиқаётгани ҳақида хабар берилганди. Маълум қилинишича, Трамп зарбалар беришни маъқуллаш масаласига жиддий ёндашмоқда. Сўнгги кунларда АҚШ президентига Эронга қарши ҳарбий ҳаракатларнинг янги вариантлари тақдим этилган. Улар орасида Теҳрондаги ҳарбий бўлмаган объектларга зарба бериш эҳтимоли ҳам бор.