Шимолий Корея Россияга қурол сотишни кескин қисқартирди 

Шимолий Кореядан Россияга қурол-яроғ етказиб бериш январь ойида кескин секинлашди. Бир ой давомида КХДР шимоли-шарқида жойлашган Расон портига атиги битта Россия кемаси кирди. Бу ҳақда Planet Labs сунъий йўлдош тасвирларига таяниб, NK News хабар берди.

Мазкур кема 14 январь куни Украинадаги уруш учун қурол ортилиши тахмин қилинган бандаргоҳга келиб тўхтаган. Таҳлилларга кўра, у Россиянинг санкция остидаги Аngara ёки Lady R кемаларидан бири бўлиши мумкин.

Бу 21 декабрдан бери Россия кемасининг Расон портига илк ташрифи ҳисобланади. Кема келишидан қарийб икки ҳафта олдин, яъни 27–31 декабрь кунлари контейнерлар қирғоқда тўплана бошлаган. 19 январдан кейин бандаргоҳда янги контейнерлар қайд этилмаган.
Октябрдан декабргача Россия кемалари Расон портига ойига камида уч марта келиб турганди. Январь ойида эса бу фаоллик кескин камайган. Худди шундай ҳолат 2025 йил январида ҳам кузатилган.

“Бунга об-ҳаво шароити сабаб бўлган бўлиши мумкин”, деб ёзади NK News.

Одатда Расон портидан ортилган юклар Россиянинг Узоқ Шарқидаги “Восточний” портига етказилади. Январь ойининг бошида порт қисман муздан холи бўлган, бироқ 24 январга келиб деярли тўлиқ музлаб қолган. Бу кичик кемалар ҳаракати учун хавф туғдирган бўлиши мумкин.

Шу билан бирга, сунъий йўлдош тасвирлари йирик кемалар орасида ҳам фаоллик паст бўлганини кўрсатмоқда. Сўнгги 20 йилдаги энг кучли совуқлар ва қор ёғиши Владивосток ва Находкага ҳам таъсир қилган, бироқ Расон портида музлаш ҳолати кузатилмаган.

Етказиб беришлар секинлашишига сиёсий омиллар ҳам таъсир қилган бўлиши мумкин. NK News маълумотига кўра, Пхеньян февраль ойининг биринчи ярмида бўлиб ўтадиган Корея Меҳнат партиясининг тўққизинчи қурултойига тайёргарлик фонида Расондаги операцияларни вақтинча тўхтатган бўлиши эҳтимол бор.

Қурултойда мамлакатнинг ҳарбий ва ташқи сиёсатидаги янги йўналишлар муҳокама қилиниши кутилмоқда. Шунингдек, вазиятга АҚШ, Россия ва Украина ўртасида давом этаётган музокаралар ҳам таъсир кўрсатган бўлиши мумкин.

“2023 йилдан бери КХДР Россияга 6,5 миллиондан 8 миллионгача артиллерия ўқ-дориларини етказиб берди, бу Россия армияси эҳтиёжларининг ярмини қоплаши мумкин эди”, деб ёзади NK News.

Етказиб берилган қуроллар орасида 250 га яқин КН-23 баллистик ракеталари, узоқ масофали Коксан қуроллари, 240 ва 107 мм реактив ўт очиш тизимлари, 60 ва 140 мм миномётлар, кассетали ўқ-дорилар, шунингдек Т-54/55 танклари учун 100 мм снарядлар бор.

Украина томони КН-23 ракетаси ёки Россиянинг “Искандер-М” мажмуаси қўлланган сўнгги тасдиқланган зарбани 13 декабрь куни қайд этган. Шундан буён Шимолий Корея баллистик ракеталаридан фойдаланилгани ҳақида янги маълумотлар йўқ.